【本報消息】勇戰神駒棄爭寶塚紀念賽

上季最佳長途馬「勇戰神駒」（圖5號）本來已經報名，出爭月底在日本舉行的G1寶塚紀念賽，不過牠跑畢遮打盃，賽後被發現喘鳴，幕後最終決定放棄遠征計劃。苗禮德近日接受傳媒訪問時表示，他留意到「勇戰神駒」身體狀況後，決定放棄遠征計劃。「勇戰神駒」上月女皇盃獲得季軍，團隊當時曾表示，會視乎牠在遮打盃中的表現，再決定是否如期到日本參賽。「勇戰神駒」最終三甲不入，只跑第五名，以六個多馬位不敵「將王」，賽後更被發現喘鳴。隨着上屆馬王「金鎗六十」早前放棄遠征，連同「勇戰神駒」在內，今個馬季沒有賽駒到外地參賽。

上周六季內最後一次快活谷試閘，編排了七組共五十九匹賽駒參與，到場觀看的馬主亦是今季最多一次，場面夠晒熱鬧，細心數吓，有第一組「正本開心」好時代團體代表，第三組「神速奔馳」林璟瑋，第四組「皇帝英明」馮柏楝伉儷、「連利福將」成員代表、「飛來勁」何建開醫生及「喜盈於心」高長昌，第五組「鼓浪精綵」吳奕琳代表，第七組「耀力之城」的凌基偉。在試閘中走勢亮眼馬匹，第三組千二米文家良馬房的「神速奔馳」值得注視，於潘頓胯下出閘順利全程緊守中間位置，入到直路稍鬆韁繩，馬兒即有強勁反應自動衝上嚟，以第二名過終點，狀態弗到痹，此駒季內五戰得兩冠兩亞，堪稱文廄新貴，上仗賽事由蔡明紹主轡，出閘論論盡盡更失晒平衡跑第九名，依家由潘頓接手，下次上陣必成眾矢之的。

上周五晚舉行嘅澳門夜賽，前退役港馬「嘉應風采」，當地改名「嘉應掌聲」繼續服役，結果再下一城，於當地沙地三戰兩冠一亞，比起當日在香港長居四、五班浮沉，跑咗三季只得一場頭馬嘅失望表現，如今以七歲高齡於異地重獲新生，當然可喜可賀。其實馬主梁錫光今季旗下「嘉應」系馬，去到季尾表現都有復甦現象，唔單止澳門攞晒威嘅「嘉應風采」，就連香港名下馬匹頂班精英「嘉應之星」，剛剛於遮打盃跑第二名不敵「將王」，成績一啲都唔失禮，同幕後廄侶「嘉應精英」最近亦執番場，「嘉應」系目前有「嘉應福星」及「嘉應精神」未贏，季尾前若見上陣定要留意。

法國靚女騎師麥晴欣轉往美國發展，上星期四於肯塔基邱吉爾園馬場舉行黃昏賽事，正式首度披甲，雖然支持有限，只得一匹坐騎Good Measure，卻能後上跑獲亞軍，異地發展總算有個好開始。麥晴欣抵埗剛好一個星期，隨即於上周六正式上陣，雖然只獲得練馬師莫格林（Graham Motion）於第七場泥地一哩賽事提供支持，坐騎Good Measure雖然屈居於當地前列騎師紀輝亮所勝頭馬R Calli Kim之後，卻能沿欄後上力拒眾駒纏鬥，力保亞席。賽後麥晴欣於個人社交網站，向一眾粉絲分享此間出賽開心經歷，對於美國首戰即上名，亦覺得是一個好開始，期望頭馬可以盡快出現。

「勝局在望」上周在日本打吡摘冠後，當地唔少人都期待呢匹三歲王者可以遠征法國，揚威凱旋門大賽。講起凱旋門大賽，就諗起去年爆出大冷門的賽果，當時是由德國代表「驚世詩才」喺大爛地擊敗由蘇銘倫策騎嘅「大利威」爆出七十二倍大冷W。

不過呢匹去年凱旋門大賽冠軍上周日喺德國巴登巴登馬場復出，角逐2200米二級賽，由於只得七駒競逐，此駒更被捧成大熱門，最終慘遭滑鐵盧，只跑得第六名，距離頭馬由薛達祺策騎嘅「鷹飛」成十七個馬位，演出令人大跌眼鏡。

由於復出戰輸得咁慘烈，海外博彩公司立即看淡「驚世詩才」衛冕法國凱旋門大賽嘅機會，由原本十五倍調高至五十一倍。

上周日係法國隆尚馬場重要賽期，英愛盟軍捧走兩項一級賽冠軍，成為最佳戰利品，當中包括由岳本賢訓練古摩亞Above The Curve，以大熱門姿態勝出聖安利爾大賽，而韋嘉訓練之「夢泰斗」則捧走伊斯巴翰錦標。

聖安利爾大賽只得六駒參戰，被捧成熱門之一是高多芬嘅Wild Beauty同古摩亞嘅Above The Curve，不過Wild Beauty繼失意於英國一千堅尼後，轉戰法國首度增程跑2000米證明效果麻麻，六駒中只跑得第五名而回，反而由岳本賢訓練嘅Above The Curve就表現神勇，最後三百米已經出頭穩操勝券，以一馬位輕取巴米高所騎法國馬Place Du Carrousel。

另一場一級賽伊斯巴翰錦標，同樣出馬冷清場面，六匹年長馬出戰，英國代表只得韋嘉單騎應戰，以五歲雌馬「夢泰斗」競逐此項一級賽，此駒挾新勝二級賽達利亞錦標，再次夥拍宋文赫遠征法國，最終擊退一眾法國代表。而巫斯義上屆憑「實勁力達」勝出此賽，今年亦有參戰，策騎由孫達志訓練嘅「日出玲瓏」跑包尾。