馬會啱啱公布最新一批嘅新馬名字，當中都有唔少得意同特別嘅馬名，好似由鄧偉業擁有，丁冠豪訓練嘅三歲PPG，改名叫做「贏你一步」，睇吓到時係咪真係贏一步啦。至於賭王何鴻燊嘅公子何猷亨亦有繼續養馬，佢亦講過會延續爸爸呢件「爆」系綵衣，自己首匹名下馬亦叫做「爆谷」。早前佢就引入咗一匹三歲法國自購馬，曾於法國跑一級賽莫尼大賽得第二名，然後去英國轉爭三級賽薩默維爾錦標亦得亞軍，故此來港評八十二分插入二班，交由方嘉柏訓練。何猷亨亦終於為呢匹新寵改咗名，就係叫做「爆熱」，佢爸爸喺香港最出色嘅名下馬就叫「爆冷」，睇吓呢匹卡士極高嘅「爆熱」，到時係咪咁犀利啦。

胡森今季分屬英國恢復從練第二季，雖然出馬次數只得廿一次已有八場頭馬見面，以佢目前養馬約三十匹嘅規模，成績相當唔錯，而且手頭有一批為相熟香港馬主訓練嘅賽駒，潛質唔錯，其中屬許晋亨名下嘅Savvy Victory，胡森更加躊躇滿志，喺部署運港服役前大有機會出戰葉森打吡。Savvy Victory剛剛本月初於潘德法馬場作新季復出，由馬昆出戰一場二千米三歲處女賽，結果以兩個半馬位之先取得勝利。雖然呢匹馬去季兩歲未贏過，跑過四場得兩亞一季一殿，表現相當穩定，對於首仗復出一出即勝，胡森賽後訪問，亦認同馬匹今季心智轉趨成熟，進步幅度甚大。胡森早已替呢匹馬報爭六月舉行嘅英國葉森打吡，以Savvy Victory之進度，要進軍呢場經典大賽，睇嚟絕對不是夢，下月舉行之一系列熱身賽，胡森將考慮於車士達銀瓶、嶺飛打吡預賽，或係東帝錦標中任擇其一，進一步考驗實力，若然爭取得入場券，肯定會出戰葉森打吡。

周末轉播英國二千堅尼

馬會將於本周末（4月30日）晚上，從英國新市場馬場即時轉播英國二千堅尼賽馬日八場賽事來港，並設立彩池接受投注。

英國二千堅尼（1600米國際一級賽）是英國賽季首項經典賽事，自1809年首次舉行以來一直是三歲馬的重要大賽，也是著名英國三冠大賽的首關賽事。二百多年以來，不少精英賽駒均曾在馳名的羅利賽道上競逐這項經典賽的冠軍殊榮。