【一矢中的】緊張大師如日方中

希斯今次再度來港開倉，唔少人都抱好大期望，當中包括馬會，事關佢覺得希斯可以頂替大摩，但當時部分圈內人只係抱觀望態度。今季過四分三，希斯交唔交到大摩嘅表現，贏幾多場一級賽？相信部分馬會中人都有失望。事關大摩最犀利嘅地方，就係用成績話俾馬主聽，絕對值得用高價引入良駒，但睇返今季，希斯仲有無呢種叫座力，令馬主斥巨資買馬？希斯現年五十九歲，相信當初大部分覺得佢今次重返香港，應該可以練到七十歲，事關以佢嘅招牌，不論頭馬同埋累積獎金應該可以長期排前列，但上季練馬師榜就排十四位，獎金只得三千七百萬，而今季希斯暫時喺練馬師榜排第六位，贏獎金超過五千萬，的確有進步，但係夠唔夠令佢可以延長練到七十歲？就一定唔夠，而且季初希斯說好的六十場頭馬可以邊一季兌現，暫時答你唔到，但今次「緊張大師」應該可以再贏一場頭馬。