對「網上新碟首唱會」一絲不苟 祖兒感觸過後孖阿Sa開after party

香港文匯報訊（記者 李思穎）容祖兒相隔5年，早前推出全新廣東話專輯《薛丁格的貓Schrodinger's Cat》，她為了答謝歌迷支持，前晚特地舉行網上新碟首唱會，首唱會上祖兒除了唱盡碟內全部歌曲，場景燈光道具布置等亦不惜工本，樂隊編排一絲不苟，一小時的首唱會換了4個造型，誠意十足。

祖兒表示這個首唱會可以滿足及達成她的心願，「由2018年開始做呢張唱片，其實好多首歌都係我當時心裏面想講嘅嘢。」儘管網上世界大行其道，祖兒仍然十分珍惜可以推出實體唱片的機會：「所以喺今次呢張唱片裏面每一首歌都記載咗很多我自己心裏面想講嘅嘢，如果你叫我去講好多大條道理，其實真係唔係好識，好多時候都係憑直覺諗到就做，所以我會比較鍾意唱歌，因為唱歌可以抒發我嘅感覺，比較自在。」

她又特別提到《明天見》是2018年為當時一位剛過世的化妝師好友而創作，但因為疫情關係，唱歌的對象已變成很多個，「因為疫情嘅關係，好多時候都要分隔兩地，同我嘅屋企人、好朋友或者同一啲關係好好嘅同事、我嘅歌迷，都未必能夠好似以前咁成日可以見面，但係我好相信我哋好快可以明天見，亦都好希望再見面嘅時候，我哋可以更好。」

綵排一度邊唱邊哭

首唱會最後除了播出祖兒跟歌迷的互動，更有她為這場首唱會綵排《明天見》的片段，只見她邊唱邊哭，場面感動。

首唱會完結後，祖兒繼續大派福利來一個「after party」，隨即在社交平台開直播，更有好姐妹蔡卓妍（阿Sa）任客席主持，不過因為沒有化妝，所以只好「見聲唔見樣」留在幕後。雖然身處幕後，只見阿Sa不時為祖兒整理頭髮，又十分留意她上鏡的角度及位置，儼如一位直播的導演，十分稱職。直播期間，只見祖兒臉紅紅，有網民即問：「你飲咗酒？」祖兒直言因為開心而淺嚐了點：「因為其實呢個演出想做好耐，隻碟又做咗好耐，所以可以做到個show畀大家聽，好開心!」祖兒又透露錄影首唱會當日天氣十分寒冷，錄影時間更由下午到凌晨十多個小時，認真辛苦。網民又問到鍾欣潼（阿嬌）在哪裏？阿Sa表示阿嬌因太累，已經返了屋企。最後祖兒和阿Sa 齊齊合唱《東京人壽》為直播作結。