唔少黃絲移民仲以為去到天堂，但點知連搵份工都難過登天。由英國駐港總領事館前情報人員、被揭喺深圳嫖娼被拘後赴英嘅鄭文傑創辦嘅「英國港僑協會」，日前發表所謂「新來英港人工作和就業」網上調研報告話，差唔多一半人仲失業或搵緊工，而搵到工嘅人中都包括飲食業、運輸、自僱同埋兼職，情況相當唔樂觀。
「英國港僑協會」早前以過去兩年赴英港人為對象進行所謂網上問卷調查，收到609份回應。結果顯示，只有約三成半人有全職、兼職或自僱工作，而當中都計埋兼職、自僱；逾四成半人失業或搵緊工；去英國前，呢班受訪者最多人從事財務或保險業、資訊與通訊業同埋教育行業，但移咗民之後佢哋最多人從事頭三位嘅行業分別就變成運輸及倉儲業，專業、科學和技術業，同埋住宿及飲食業。
受訪者中逾三成人並無大學學歷，有研究生以上學歷嘅人亦都唔夠兩成半。
黃媒「美化」報道圖淡化
雖然調查結果慘不忍睹，但黃媒《立場新聞》《眾新聞》等都想將佢包得靚啲，於是以《移英港人調查：逾半受訪者移英前年薪36萬港元 八成英國已就職者 3個月覓得工作》為題報道。所謂「逾半受訪者移英前年薪36萬港元」，但即使唔講到家仲失業，咁英國搵到工家人工幾多，點解唔提呢？「八成英國已就職者 3個月覓得工作」 ，首先搵到工者只係得三成半人，家用個咁標題，明顯係企圖淡化呢樣啦！
唔少網民其實都好心水清。「Perry Sih」話：「三分之一嘅人搵到工。當中八成於三個月內搵到。即係只有24%人三個月內搵到，而唔係好似標題咁誤導，聽起上黎（嚟）大部分人都好快搵到工。」
見到咁嘅調查結果，好多人就覺得佢哋係攞嚟衰。「Chris Chung」就問：「讀完大學，咁讀黎（嚟）做乜？做倉（倉務員）、交通（運輸）！」
「Su Ho」就話：「依（𠵱）家過英國，唔使諗，有拖頭（車）牌就OK，其他D（啲）專業人仕（士）衹（只）好搓（揸）鍋鏟。」
「Sam Chow」都話：「過到去英國做運輸及貨艙（倉），係因為唔夠人競爭所以去做勞工。」
有網民都覺得人離鄉賤，赴英就要面對大把難題。「Blues Chung」就話：「返工果（嗰）陣就知味道了，種族歧視喺英國辦公室最是經典！我作為從英國回流香港之輩，百般滋味在心頭。」
「Chi Ho Yuen」則問：「佢哋有冇話你知每年要交幾多薪俸稅？物價有幾高？未搵到工嗰啲以後日子點樣過？治安有幾好？一家大細出街食餐飯要幾錢呀？子女讀書係唔係十二年免費教育呀？呢啲都係部份（分）問題……」●香港文匯報記者 黃書蘭
0
已點過讚
0 / 255