【網議政事】「獨販」隊酒慶祝 「手Joke」變棄卒

周永康班人所謂嘅「HKDC」其實都係佢哋嘅圍爐嘢，真正引起廣大網民關注嘅，係佢哋再一次完美上演「叫人衝，自己鬆」。日前中秋佳節，遠在美國嘅羅冠聰、張崑陽、周永康等人歡聚，仲聲稱好掛住「手足」。不過，呢啲開心飲食嘅相就惹來好多人不滿，質疑「手足」「看見佢地（哋）個笑容，有無心理作用覺得佢地（哋）響（嚮）度笑緊你做咗佢地（哋）免費condom（棄卒）？」羅冠聰日前喺fb發帖，話自己中秋節有啲「感慨」，仲不忘抽水話「賢學思政」班人俾人拉，而佢哋作為「逃亡人士」，亦要「制衡」「惡勢力」喎，仲自稱「我們這群努力鋪墊回家之路的孩子，在這個局勢，就更應該互相支持」添（）。咁係點互相扶持呢？咪就係出嚟飲飲食食歡聚下囉。

fb專頁「上一代欠你什麼？」就發文斥責：「坐緊監坐完監等坐監又或者其他一身蟻嘅『手足』，見到呢班老早就唔同大家齊上齊落，『快人一步·理想達到』着草去咗外國嘅leader（頭目）可以咁優（悠）閒，中秋佳節響美國聚埋一齊飲嘢，有乜感受？有無諗過之前不同組織、工會、黃店不停眾籌和遊行時，一個個紅白藍捐款運走話幫『手足』啲錢去曬（晒）邊？而呢班人而（）家又係靠乜維生？而同樣係『抗爭』，點解你又無佢地（哋）呢種精彩人生呢？看見佢地（哋）個笑容，有無心理作用覺得佢地（哋）響（嚮）度笑緊你做咗佢地（哋）免費condom？」

民建聯立法會議員張國鈞就話「兄弟爬山，各有各食」，並揶揄：「其實『手joke』越墮落，佢哋越快樂……點解？唔墮落又點樣賣慘？唔賣慘又點樣繼續呃人入錢去把酒言歡？只係好多人仲係唔肯面對真相！」

《輔仁媒體》主編容樂其亦食花生地表示：「心情複雜，勇敢地走下去。」

同時，好多網民都睇唔過眼。「Mikami Yua」揶揄：「勇敢哋走咗去。」「Lok Kit」問：「咁開心唔知傾咩？我諗話題離不開問大家cap左（咗）幾錢過泥（嚟），美金加港幣。」 ●香港文匯報記者 鄭治祖