【貴圈真亂】疑借黃店散貨 網民：無證明點信

有黃絲嘅地方就有亂象。有網民日前喺facebook出post，話有「手足」幫黃店入咗2,000箱文旦禮盒，結果俾黃店棄單，只肯要500箱，於是叫啲「同路人」幫手散貨。批發商「Taiwanfruit886」隨後出post自認係受害者，但就話「唔會公開棄單嘅黃店名」，亦都冇任何相關證據，亦唔肯出示船運單等，有黃絲就質疑成件事只係宣傳橋。不過，多個攬炒派前區議員唔理咁多照搞同款文旦團購，唔知有幾多黃絲「願者上鈎」呢？

買咗2,000箱文旦俾人蹺起固然係慘，但睇返「Taiwanfruit886」個帖文，原來所謂黃店棄單時，佢哋其實都可以同台灣果農減返訂購數量，但「唔希望對台灣嘅小果農影響太大，同時亦唔想影響香港人喺台灣人嘅印象」，所以都堅持要2,000箱喎。

咁1,500箱點算呢？梗係叫黃絲食咗佢啦。雖然係請人幫手散貨，但價錢都幾唔客氣，買10箱以下要168蚊一箱，多過100箱就降價到80蚊一箱，因為係「運輸成本」問題喎。

「軍火佬」參戰求開名

唔少網民都質疑件事到底係點。「Gary Ng」話：「點會無啦啦幫人入2,000箱？」「ATell Chan」直言：「似苦肉計、宣傳橋囉。如果係真，佢話棄單間黃店改咗要500箱，佢而（𠵱）家爆響口，唔驚人哋連嗰500箱都唔要咩。」「Kate Lam」都問：「如果有心散貨，點會散買同買100箱以上差一倍價錢？」網媒「軍火佬」都加入戰爭：「我都好想知邊間黃店，可以棄2,000箱貨，有人可以提供資料嗎？」

「Taiwanfruit886」就重申自己係「俾黃店棄單」，但唔會開名，因為「唔希望批鬥嘅風氣繼續喺黃圈入面延續」。有網民要求佢哋出示船運單或者相關文件，間舖好大官威咁話「唔會提供」，除非對方可以畀錢買起佢哋一櫃文旦先會公開。

態度咁寸，網民自然唔收貨。網民「李雯雯」就直言：「似呃錢多。」「Hy Louis」就感嘆：「乜證明都沒，得個講字！點信啊！連啲貨都唔識影一影。」「Dinboy Baku」都話：「如果佢夠膽就公開張單出黎（嚟），計番（返）個成本數。」「Roy Chu」話：「黃店殺人都要填命，唔係咩批鬥唔批鬥既（嘅）問題。有錯，出黎（嚟）道歉；冇錯，出黎（嚟）澄清。而（𠵱）家真心感覺上似係一套自編自說既（嘅）鬧劇。」「Amy Kong」就話：「反正全香港嘅文旦我都唔會買，費事益距（佢）呢個呃錢黨。」

攬炒派前區員搞團購

咁啱得咁蹺，屯門前區議員黎駿穎、元朗前區議員吳玉英、元朗前區議員伍健偉日前都有出post或轉發post，話可以畀街坊「團購」文旦，同「Taiwanfruit886」嘅文旦產地、品種、每箱嘅規格都一樣，不過價錢就150蚊一箱。唔知佢哋中間可以賺幾多呢？●香港文匯報記者 藍松山