公務員事務局前局長王永平繼舊年7月刪除facebook專頁後，日前喺佢自己報章專欄聲稱「可談的事數不勝數」，但「下筆越來越困難，而寫出來的文章，也看不到對時局有甚（什）麼正面作用」，宣布停筆。呢位成日標榜公務員「政治中立」出自自己手筆嘅「作」家，終於收手，唔少網民留言「歡送」，順便食埋花生。

身為特區政府前問責官員，王永平在位時無乜政績都算，一直以來喺報章寫嘅文章話就話係評論時事，但大多係鬧政府，而且經常「失憶症發作」，例如2012年6月5日，幾個公務員工會去信立法會，呼籲立法會以香港的大局為重，並考慮公務員對施政受阻帶來負擔和壓力的擔憂，讓特區政府順利交接換屆。當時，王永平指稱這些公務員團體「損害公務員政治中立」。

事實上，王永平仲係局長嗰陣，曾經喺立法會回答議員提問時講過，公務員「政治中立」嘅原則，「首先是建基於效忠政府的責任及所有公務員應對在任的行政長官和主要官員盡忠。」

但其後他寫文抹黑特區政府時就另一副嘴臉，仲經常話「公務員守則中的政治中立是我寫的」，但實際上根本唔關佢事，而係香港回歸祖國後第一任公務員事務局局長林煥光所寫。

日前，王永平寫咗「最後一篇文章」，宣布自己停筆。佢話，自己停筆嘅原因係「可談的事數不勝數」，但「下筆越來越困難，而寫出來的文章，也看不到對時局有甚（什）麼正面作用，與其欲言又止，不如放下自在」。

有網民第一時間就出嚟表示贊同，「Ryan Chan」就直言：「佢終於都醒覺自己寫出離（嚟）嘅文章唔會對時局冇『正面作用』，簡單離（嚟）講即係廢話！」「Iry」更大鬧：「最憎食碗面反碗底的（嘅）陰險小人！在位時冇建設，司司（思思）縮縮，唯唯諾諾一聲都冇；退休後就陰陰濕濕指鹿為馬發惡言，正一搞（攪）屎棍！」

批王無能冇骨氣扮高尚

「Yue Lin Wai」就話：「應該一早Cut佢長糧，無能又冇骨氣！又要正苦（政府）長養，扮乜高尚？唔見佢收錢時話唔要嘅。」「馬爾康」就咁評價佢：「居其位時就一事無成，退落黎（嚟）後就亂發噏瘋！」好多網民都話其實佢自己縮骨，明明係驚自己寫嘅嘢被法律追究，仲要扮晒可憐。

「我係中間派」就忍唔住話：「食住長粮（糧）講政府壞話，討好黃人，善惡不分，而（）家就驚比（俾）人拉，急急走人，可恥！」其實，驚咪認咗佢囉，唔需要咁怕醜嘅，仲要搵埋咁多理由，咪好似家咁俾人引為笑柄。●香港文匯報記者 藍松山