所謂嘅「手足」呃錢已經唔係一日兩日嘅事，黃絲上得當多都開始醒水。噚日，有位自稱係「屠龍小隊」成員嘅網民「對空吟唱」喺「連登」發帖，講到自己同隊友好慘，呼籲黃絲課金畀佢哋。不過，一班「連登仔」就認為佢一啲證據都冇，擺明係呃錢，譏諷佢唔係「屠龍小隊」，係「屠深黃銀包」啫。

「對空吟唱」噚日以「屠龍想阻你一分鍾（鐘）」為題發帖，稱佢哋係「流亡海外既（嘅）屠龍小隊成員James，Edward同Chris……分別流亡於台灣、英國同澳洲。」

然後佢繼續話，「流亡」之後各自都忙於盡力適應及融入當地嘅生活，部分人都曾經同朋友借錢交租同應付生活開支，不過因為疫情同「其他問題」，令佢哋喺住屋同工作方面都開始出現問題喎，所以希望大家課金資助吓佢哋咁話。

睇埋佢哋眾籌嘅網頁，內容話「Edward」患有先天眼疾要做手術，又話佢喺黑暴中俾橡膠子彈「擊中後腦」，網頁入面仲有疑似爆後腦嘅相。

稱有「爆後腦」成員流落澳洲

黃絲又唔係第一次見呢啲「大場面」，以前已經見過「爆眼女」眼仔睩睩去台灣，今次話「爆後腦Edward」去澳洲，大家戒心自然重。連登仔「吳子豪」留言反問：「你話係就係？」「派克雞排（椒鹽）」指：「真，乜都冇就話係。」「北極三文魚」質疑：「又上黎（嚟）搵水魚，連仔做嘢啦。」「誠哥的繼承者們」形容：「又呃錢」。「梁頌恆搭的士」認為佢係「屠深黃銀包」，「清水灣曼不群」覺得佢哋：「又收錢去鋸扒先。」「ipz-127」更恥笑：「一條龍養到佢80歲。」

佢哋係咪「屠龍小隊」似乎就難以證實嘞，不過今次就應該屠唔到咩人銀包囉。●香港文匯報記者 鄭治祖