區議員宣誓在即，大批攬炒派心虛辭職，但似乎有人想喺臨走「撈返一筆」。剛辭職嘅油尖旺區議會前副主席、公民黨前執委余德寶日前就喺自己facebook發帖，話自己「有困難」，「希望可以請街坊集氣五萬元」，資助「結束辦事處開支」，以議辦停運為由搞眾籌。乜堂堂區議會前副主席嘅「食相」都搞到咁難睇，難怪成班所謂「齊上齊落」嘅「同路人」都話頂唔順要圍插佢，鬧佢係「政棍之中嘅政棍」。

余德寶日前喺fb以「街坊集氣五萬元 結束辦事處開支」為題發帖，佢話：「如今，德寶有困難，希望大家可以集氣，因為我們突然辭職，不能申領政府七萬元結束辦事處開支……細數結束海富苑辦事處開支保守估計需要超過八萬宗（元），數目並不少，希望可以請街坊集氣五萬元……」

其實區會副主席份人工已經比普通區議員多半份，余德寶呢個時候仲要籌旗，唔少攬炒派「同路人」自然鬧爆。

沙田前區議員、公民黨前成員黃文萱就發帖話：「大佬，辭職都係旨（指）望公民社會有需要時互助，唔係叫你叫街坊『科水』五萬蚊結束辦事處……公民社會資源唔係取之不盡㗎，先未計你已經係副主席人工多啲。」佢仲hashtag「真係好嘔（噁）心呀大佬」。

大埔前區議員、新民主同盟前成員周炫瑋就話：「18個月都至少多我地（哋）二十幾萬（元）。」沙田區議員許立燊都話：「個（嗰）位薪津好似已經高過我地（哋）……」

余德寶「食相」咁難睇，沙田區議員、公民黨成員陳珮明都忍唔住話：「見賢思齊，見不賢而內自省。」「Un Un」就話：「佢係我大學同學同同屆，so shame（真可恥）。」

公民黨成員王德全仲話要追佢還錢：「德寶大佬，你咁都做得出。你還番（返）我請你食的早餐，仲有你選到，我比（畀）住錢你同你女朋友食飯，你無還，你還番（返）比（畀）我。」

不過，深水埗區議會副主席、前公民黨成員伍月蘭就話踢爆有人不嬲都有借冇還：「佢從來冇還過錢比（畀）任何人，實習生都有借冇還。」

沙田區議會前議員、新民主同盟前成員趙柱幫就咁話：「政棍之中嘅政棍，衰×過乞兒，今時今日辭職仲要問街坊攞錢。」

見咁多「同路人」都紛紛割席大鬧余「已完」，希望仲想藉辭職斂財嘅「已完」可以停一停、諗一諗。●香港文匯報記者 黃書蘭