追星究竟可唔可以成為一種「抗爭」手段，日前喺黃圈掀起熱烈討論。自稱「獨立記者」嘅「白影」（Jeffrey Ybanez）日前喺facebook開post，話近日同身邊朋友食飯時對方講起追星，而佢就好認真咁話，自前年起已經冇晒心情睇任何娛樂嘢，仲話香港已經冇得救，佢亦唔想去理解大家呢種「戰敗」後自我放縱嘅行為喎。可能黃絲真係鍾意追星多過「抗爭」，大批網民於是圍攻「白影」，鬧返佢冇器量兼玩「情緒勒索」。

話說「白影」日前開post話，唔明點解香港人𠵱家仲會有心情睇男團「Mirror」同「Error」，佢朋友早幾日同佢食飯嗰陣就話「場仗輸咗」，叫「白影」搵啲娛樂放鬆吓，點知「白影」就好激動咁批評唔應該𠵱家追星：「娛樂好多種，Board Game訓練腦筋，做愛維持恩愛。但追星呢啲完全無任何建樹，我唔覺係呢個時候應該有嘅娛樂。」佢最後仲發晦氣：「不過算了，香港無（冇）得救，所以我唔反對啲人去追星或者投放精神同時間去啲偶像度，戰敗了的自我放縱。只係唔好再嘗試叫我參與或者去理解。」

眼見「白影」呢啲「神邏輯」，黃絲網民「Clc Chan」好不滿：「唔該你唔好借追星嚟合理化自己行為，照你呢個logic，嗰啲乜×嘢board game同sex其實都唔應該做，講到自己為咗抗爭好似好偉大咁，你又知其他追星嗰啲之前冇付出過？」

陳浩天趁機「抽水」

前「香港民族黨」召集人陳浩天更借機發帖「抒情」，神化「Mirror」同「Error」，話佢哋係「代表一班留係（喺）香港嘅人」，話乜「作為香港人要發明星夢，大概只能靠香港呢個舞台……香港人要做大明星，就只能先造靚香港呢個舞台。可能呢啲就係所謂嘅『羈絆』，香港人同香港嘅羈絆。」

面對數百個鬧自己嘅留言，「白影」貼出自己早前撰寫有關銅鑼灣襲警案刀手「自刺失救」嘅「抗爭」報道，又連發多個post單單打打。既然公然引戰，自然有人接戰。「獨派」嘅「本小姐」fb專頁就踢爆「其實某公民記者一向都鍾意賣小強搏（博）課金，……講到好似全世界啲記者都hea做係得佢勤力咁，一次又一次話自己有獨家料，最後又係報流料。」

惱羞成怒割席

「Simon Lim」就話，「你自己有心情玩board game，冇興趣追星，就自我開脫話玩board game情有可原，而追星『唔係呢個時候應該有嘅娛樂』，情緒勒索人點可能仲有心情追星。」仲話「我就寧願呢個社會多一個追星族，少一個你呢啲垃圾KOL--前者至少真係實實在在幫香港build up緊一啲嘢。」

「白影」最終更惱羞成怒話要割席：「我睇唔過眼仲有香港人有心情去追星係我錯？唔同意就要追擊？……我呢度唔歡迎腦殘，不理黃藍都會Block！」

●香港文匯報記者 雨航