貴圈真亂：欠供員工MPF被「同路人」狙擊 前助理：王進洋人格有問題

「癮君子」攬炒派離島區區議員王進洋日前因為冇為員工供款強積金而被捕，之後佢反而將事件同「國安法」扯上關係，企圖炒作事件，連啲「同路人」都幫佢唔落，紛紛企出嚟篤佢背脊，唔單只質疑佢人格有問題，仲爆出佢話畀區議員嘅免審查資助都話係屬於自己，而王進洋亦都話連冇交強積金都係員工問題，話班人玩緊朋黨欺凌，搞到一地花生。

錢銀轇轕被捕 反炒作國安法

王進洋日前俾警方拉咗後，就第一時間喺社交媒體稱「可能屬於國安法及商業罪案」，一小時後又將帖文刪除，改稱自己只係因一宗與強積金有關案件被通緝而被捕。之後，佢喺facebook帖文辯稱「我呢件事呢——唔係『自編自導自演』搏（博）出位搏（博）上新聞」。

佢仲自爆將自住公屋分租給一名女「手足」，聲稱自己前晚由他人處得悉該女子講大話，所以諗住趕佢走，兩人因此發生爭吵。該女子就話，王欠佢一萬蚊，但王不認數，於是報警求助，才令佢被拉。

王進洋炒作咗咁一大輪，扮到自己無辜又友善，但就被同今次強積金事件有關嘅、佢嘅前助理「Neo Tang」鄧書文公開狙擊。

「Neo Tang」喺facebook狠批王進洋：「喺扣除咗薪金之後，（王進洋）持續半年時間未有繳交強積金供款嘅。而向某人反映過之後呢，當時（事）人係態度非常之不合作，甚至有講過類似『歡迎投訴我』之類嘅說話。」於是，佢向積金局投訴王進洋，積金局就話會幫佢追返欠款，同時將啲證據交付律政司，最後都會作出檢控，而提堂嘅時間係今年年頭。

「扮被打壓 淨係想出風頭」

「Neo Tang」話：「所以去返今日，有人（王進洋）畀（俾）警察發現被通緝，然後有媒體話關MPF事，咁大家都知咩料啦。亦都解釋返點解會係由警察去拉呢，點解唔供MPF都要通緝呢？就係咁嘅事。」

佢仲揶揄王進洋：「有啲乜就拉國安嚟講，出完post拎完first impression扮被打壓之後再del post。」

呢啲仲唔夠，「Neo Tang」仲狠批王進洋「人格有問題，淨係想出風頭」，返工唔負責都算，仲要「屈個坐緊監嘅人，話人支持自己繼續連任，搏（博）取同情，搞到人哋要係（喺）獄中寫信出嚟澄清話唔好搞佢」，仲爆出「佢就話個（嗰）筆畀區議員嘅八千幾蚊免審查資助，『實質上係畀佢嘅』，而當時係另一位助理屢次要求要畀petty cash去日常運作，佢先每個月拎2,000蚊出嚟。」

轉發該帖文嘅fb專頁「本小姐」就話，「睇黎王進洋想搶蟎仔（『熱血公民』鄭錦滿）個超音鼠（一邊跑一邊收集金幣）寶座……唔好似（以）為選左（咗）個打黃絲旗號嘅區議員就一定好，真係睇到好尷尬。」

王進洋噚日就出post反駁鄧書文，話「一開始你黎（嚟）我呢份工做野（嘢）嘅時候，講到明係每個月嘅mpf由助理負責」，又質疑佢根本唔配18k嘅人工，同時話埋「本小姐」「咁中（鍾）意玩朋黨欺凌，睇下幾時有報應」喎。

有心水清嘅網民就追問佢，mpf 5%係僱主僱員各一半，點解「由助理負責」。王進洋就話自己畀錢，佢哋負責交，而自己無畀錢嘅原因「係因為：我次次比（畀）完錢，agent都彈返比（畀）我話唔岩（啱）數。一過左（咗）deadline，就已經等如欠款」。「Sing Yeung」就寸佢「我做銀行都好幾年，就未聽過MPF會打回頭。」

●香港文匯報記者 藍松山