網議政事：黑暴裝行「貓步」 黃絲：肉酸難睇

黃絲最鍾意炒作博出位，丟架就丟到外國。英國早前舉行「Top Model UK 」比賽，有香港參賽隊伍就以所謂「抗爭」做主題，仲以黑暴為概念設計服裝出賽。不過，一班「同路人」就似乎唔認同咁嘅做法，仲直言成件事好「肉酸」，叫佢哋唔好丟香港人嘅架𠻹。

有份參賽嘅模特兒Catherine早前將自己打扮成所謂嘅「香港民主女神」行catwalk。只見佢頭戴黃色頭盔、護目鏡，頸上掛有防毒面具，身上着住畫滿黑暴圖案嘅上衣，手中仲要執起一把長柄黑傘，咁嘅裝束同上街搞破壞嘅黑暴簡直無分別，如此丟架仲要洋洋得意。

佢喺接受《立場新聞》訪問時聲言，希望將今次嘅「時裝作品」成為宣揚香港文化嘅一環，仲話想同香港人講「『抗爭』有好多種，人人都可以在自己崗位出力」云云。

雖然Catherine「自信爆棚」，仲幻想自己可以做「英雄」，但就有唔少「同路人」潑佢冷水，話佢一身黑暴造型好「肉酸」。「Bee Kenny」就批評：「唔好出醜喇（啦）、好核突呀、丟曬（晒）架香港人嘅架！」「Cha Cha」就話：「肉酸又難睇，除左（咗）王（黃）C（絲）啱睇，正常人見到都鄙視至極。」「黃恩騰」揶揄：「本土特色？九唔搭八！」

●香港文匯報記者 倪思言