特區政府喺2月提出修訂公職人員宣誓條例後，多名靠黑暴上位嘅攬炒派區議員相繼離任，但有人就拖到喺法例刊憲前一日先至宣布辭任，到底係唔捨得班街坊，定係份糧呢？有傳媒早前踢爆，中西區區議員何致宏去年底得悉政府將會要求區議員宣誓後，早喺今年1月已經飛抵英國，自此街坊喺辦事處同區議會會議上都搵唔到何致宏嘅身影。隔咗幾個月，何致宏嘅助理先透露佢因為「身體抱恙」即將辭任，俾網民揶揄呃糧呃到最後一刻，真係不得不佩服何致宏嘅「生意頭腦」。

何託病hea埋最後4個月

唔少街坊早前都好擔心隱咗形幾個月嘅何致宏「遭遇不測」，結果就有傳媒話佢早已遠走英國。有網媒噚日刊出訪問何致宏助理Matt嘅報道，聲稱何致宏患有抑鬱症，病情更因為今年初警方嘅「初選大搜捕」而「加劇」，所以自1月起越嚟越少返辦事處喎。

Matt又重提何致宏去年因為「涉嫌管有危險藥物」被捕，至今年3月先喺fb交代當時俾警方搜身搵到嘅危險藥物，其實都係「由醫生處方」嘅「情緒病藥物」，又話何致宏早喺傳出政府要求區議員宣誓嘅消息後已經「傾向唔宣誓」，故佢嚟緊將會辭任中西區區議員喎。

雖然成件事講起就似層層，但唔少網民都質疑何致宏根本有心拖延，有網民就貼返何致宏去年11月嘅fb帖文：當時，何致宏知悉區議員可能需要宣誓後就話：「我們眾多區議員都只能本着做得一日得一日的心態……」「Chan Ho Lam」就據此質疑：「做得一日得一日，所以係咪呃得一日糧得一日？」

「Maggie Lui」亦搲晒頭：「既然當初已經傾向不宣誓，點解要係（喺）條例就來生效先辭職？」「Gary Ip」就揶揄：「唔駛（使）做但又有糧出，咁當然出多幾個月糧先啦！」

任公職拒宣誓賴打壓

除咗何致宏，喺「死線」前先遞辭職信嘅仲有沙田區議員丁仕元。佢噚日喺fb貼文話，自己早喺小學四年級起已經參與「愛國民主運動」，喺政治制度嘅「改變」下，「已經不能暢所欲言地為香港市民服務及發聲。」為咗「唔想家人終日活在惶恐之中」，所以佢「無奈」辭任區議員，並會喺6月1日正式生效。

翻查資料，丁仕元從政初期曾任民主黨前主席劉慧卿嘅助理。2018年，丁仕元同部分喺新界東進行地區工作嘅民主黨成員，疑因不滿黨內有人用人唯親而退出民主黨，並聯同多名沙田區獨立區議員成立所謂「沙田區政」。 ●香港文匯報記者 雨航