【網議政事】《852郵報》無錢焗遣散 游清源自爆怕「立假新聞法」

經常煽暴煽「獨」、僅存活約7年半嘅網媒《852郵報》噚日遣散全部6名員工，身兼總編輯嘅創辦人游清源（真名：袁耀清）同日喺YouTube出片，稱是次遣散主因係冇錢，而導火線就係特區政府擬針對假新聞立法。講到咁明顯，啲網民就明晒，話若報嘅係真新聞，點解要怕所謂未來的新法例，又揶揄今日852郵報歸故土，他朝《蘋果日報》、立場也相同。

遣散全部員工變一人公司

游清源噚日喺YouTube發表「暫別感言」，話遣散咗全部員工，之後變一人公司，繼續透過《852郵報》平台發表時事評論短片同埋文章。

唔拉埋特區政府落水，就唔係攬炒派風格。游清源話財政無法支持係遣散主因，但就聲稱導火線係特區政府擬針對假新聞立法，咁講法令人質疑佢哋到底一直以嚟係做緊乜新聞呢？

佢仲講到自己會「出生入死」咁：「我主要做評論，一人營運可以避免同事面對假新聞法受無妄之災，搞到我冇乜所謂，（不想）搞到同事。……睇返最近『泛民』（因涉嫌干犯法例而入獄或還押），都講實際處身環境係幾痛苦，留返自己營運一來方便。」

網民恥笑：證明做「假」

雖然佢咁盡情賣慘同抹黑當局，但網民都似乎唔買賬。「Frank Cheung」直言：「平生不作虧心事，半夜敲門也不驚……」「Eric Tong」質問：「真·新聞，點解要怕所謂未來的新法例 ？」「Mc Kong」恥笑：「哈哈……擬立假新聞法，就即散！這証（證）明了這個郵報係做『假』嗎？」「Chan Jimmy」話：「都未立法就已經縮沙收皮了。」「Chun Sing Kwok」則開心話：「今日852郵報歸故土，他朝毒果、立場也相同。」

游嘅言論仲招來網民對852嘅「中肯評價」。「Tom Tsang」話：「852『佔中』開始都係慣性報假料。唔係分化。只係講事實。」「Ryan Chan」強調：「傳媒有責任核實消息真偽先公開發放，選擇性發放未經證實嘅消息係不專業嘅表現。」「佛印大師」直言：「死因主要是內容垃圾。」

●香港文匯報記者 文根茂