香港文匯報訊 外表野性剛烈的鍾舒祺（Sukie），日前為電影《遺愛》主題曲《Dream All Dreams》拍攝MV，同場感性剖白內心對親情的重視，盡顯柔情一面。Sukie表示：「我喺屋企嘅角色係長期講笑，令到屋企嘅氛圍好輕鬆，希望父母會感受到我點樣投入屋企。屋企人從來都係最緊要，雖然自己唔係好識表達心入面嘅愛，唔係一個隨便講得出『我愛你』、『我掛住你』嘅人，不過我學習緊以行動去表達自己，會成日迫自己去做呢啲肉麻嘢，有時講完『我愛你』自己都會打冷震。其實日日都係母親節，最緊要日日都一樣咁錫媽咪！」

Sukie為《Dream All Dreams》錄音前，特別了解電影中角色的動人故事，Sukie透露：「我相信每個年輕人都會有自己夢想，尤其每個女仔都會期盼未來，去追尋幸福，不過現實環境可能令佢哋被迫放棄，好似電影入面陳漢娜同陶禧玲兩個角色咁，本性善良仲愛旁人多過愛自己，好彩電影入面有鄭中基呢個大哥哥守護住佢哋！而我喺現實生活中，就多得我老公一直喺身邊不離不棄，今次更加孖住客串呢部電影，完全係形影不離！」