貴圈真亂：黃店侵權賣「連豬」 連登聲言會追究

網上討論區「連登（LIHKG)」近日以官方身份同「十八區連豬」嘅創作者阿慘發出聯合聲明，原來有間叫「Involve Concept」嘅組織早前謊稱已獲得「連登」官方授權，更製作大量「連豬」公仔出售，「連登」話喺同該組織交涉期間，覺得對方態度惡劣而且多次詐騙寄賣商戶，要求涉事組織負責人立即停止侵權行為，否則會保留追究權利喎。其實大家都係「同路人」，又何必分得咁細呢？

謊稱官方授權牟利

「連登」喺討論區以官方身份發聲明話，佢哋非常歡迎「創作者」對「連登」系列嘅角色進行二次創作，但唔可以用喺未經批准嘅牟利用途，過去亦批准大量版權申請者將有關角色製成義賣品出售，點知佢哋近日接獲唔少商戶投訴，發現有人謊稱已獲「官方授權」，並喺幾十間店舖寄賣侵權嘅「連豬」產品，仲要公然用「18區連豬匙扣」及「連豬公仔」為名目作牟利用途。

「連登」就話「Involve Concept」嘅負責人潘先生去年初起已開始生產並售賣「連豬」公仔，直至今年2月被新春市集施壓先至首次發電郵畀佢哋查詢版權問題，但「連登」喺交涉期間發現潘先生講大話，包括向商戶聲稱「十八區連豬」係「公開授權」、否認用過「連登」正式名義售賣等。「連登」其後仲列出「Involve Concept」嘅社交媒體截圖，踢爆對方公開用「連豬」名義推廣產品。

但最觸動「連登」同原創者阿慘神經嘅係，呢個潘先生竟然話對「連豬」角色嘅歷史冇乜考究，死撐幫「連豬」換件衫就等於「新設計」，甚至好寸咁話，「官方」賣「連豬」嗰陣佢「也沒說LIHKG的不是」，結果「連登」認為潘先生嘅講法係「暗指LIHKG抄襲其侵權公仔」「其中陳述其銷售侵犯版權商品之詭辯簡直令人匪夷所思」。

呢個潘先生最後雖然死要面咁話「如果不想合作我們就只能各走各的路」，但都淆晒底咁話「日後我會低調營運，5月份結束這批業務。」

「真係人無恥便無敵」

睇住阿慘都譴責潘先生指鹿為馬，唔少「連登」網民亦加入聲討，好似「搭巴士放學」就話：「侵完權然後話原創者好霸道！比（畀）我侵權賺錢都唔得！好狗！」「盜民宅」就直言：「由黃老細『手足』互相支持嘅黃色經濟圈，變成售賣『抗爭』情懷嘅黃色紀念品圈。」「打到白卡當贏」就拍晒手：「真係人無恥便無敵。」

呢個時候總係有人叫大家包容吓，「Cyruz」就問：「大家都係黃，真係要告嗎？俾（畀）次機會？」但「我同你講我冇問題」就好惡咁反駁：「我×曬（晒）你地（哋），不嬲黃係基本，有老鼠屎就清理！」

●香港文匯報記者 雨航