劣食奉顧客 「黃絲」照埋單

人以群分呢句說話真係冇講錯㗎，「黃店」連賣「酸臭」盆菜都可以撈埋一份，真係「世界奇跡」。繼「初見」同「幫緊你美食速遞」用盆菜價錢賣出餿水嘅味道，以及懷疑有「手足」落格後，疑似圍毆《環球時報》記者其中一名暴徒嘅「五味真火」老闆，近日亦賣出有酸味嘅盆菜，點知被投訴後潛水多日，直至前日先上水道歉同退款，但「黃絲」選擇性失憶，自我遺忘之前對老闆嘅謾罵，反而照單全收，唔怪得「黃店」成日都當「黃絲」係水魚啦。

話說上個月，「五味真火」開賣成千蚊嘅4人至6人分量盆菜，點知收到貨嘅顧客即刻火都嚟，並懷疑「五味真火」係咪同「初見」有關係，因為盆嘢係酸嘅，根本難以下咽。

收貨拆晒天 晒冧當無數

當時，顧客喺「五味真火」嘅fb page瘋狂留言嘲諷，「Steve Yip」問：「我想問吓老闆係唔係新配方，用益力多做湯底！」「Thom Crowe」嘲諷：「用盆菜養乳酸菌你都可謂首創！」「James Lau」訴苦：「又酸又梅（霉），d（啲）蝦頭黑色，成盤（盆）掉左（咗），1,488（元）加運費，年初一要趕落街買外賣……」

點知，前日「五味真火」老闆終於上水道歉，話因為訂單較多導致盆菜食物質素下降，加上願意退款後，「黃絲」即刻變咗第二個人咁，照單全收，並鼓勵老闆。「Jess Lai」話：「既然認咗錯，又肯承擔，咪再比（畀）次機會。」「Leti Lee」說：「我都係11號盆菜嘅顧客，食物係酸咗，不過你哋主動承擔、認錯同負責任，我完全接受你哋嘅道歉，錢亦都唔需要退了，知道問題下次檢討同改善就好，加油。」

睇到呢種情況，都唔怪得「黃店」成日都當「黃絲」係水魚啦，畢竟為咗所謂嘅「理念」，少少酸又有乜所謂。