【網議政事】「跪低」派港鐵利是封 網民譏攬炒派攞着數

修例風波以嚟，「黃絲」就宣稱要抵制港鐵，除咗話要罷搭之外，仲出盡陰招破壞港鐵設施。不過「黃絲」一向口講一套，身體卻很誠實。好似有份參與攬炒派舉行「初選」嘅中西區區議員何致宏，日前竟派港鐵利是封，唔少網民就揶揄搞唔清楚佢究竟乜立場，仲斥責佢「利」字當頭，打人哋本做自己嘢呢。 

何致宏早前喺facebook貼出港鐵嘅利是封，仲留言話：「新春將至，現有MTR利是封派發，歡迎前來領取，數量有限，派完即止。」

張國鈞質疑何係乜嘢立場？

針對港鐵同時又幫佢派利是封，真係睇到大家都搲晒頭，難怪立法會議員張國鈞都問：「又要鬧人哋做『黨鐵』，點解轉個頭又幫『黨鐵』派利是封，究竟係乜嘢立場？」 

網民就推測，利益當前，攬炒派梗係攞咗着數先算啦。好似「Kam Kam」就話：「利益當（前）先係『黃屍（絲）』一向作風。」「Siu Cheung So」就話：「因不用成本，利用MTR利是封當作自己打本為街坊做事。」「Winnie Tam」就批評：「唔駛（使）本派俾街坊仲有credit拎，cheap到痺（痹）。」「Cheung Sky」更加笑佢哋：「自己無野（嘢）派，派對家既（嘅），自己唔想做，俾（畀）對家做。」攬炒派區議員畀市民留低咁嘅印象，真係要得閒好好反思吓嚕。  ●香港文匯報記者  倪思言