【騎練軍情】哈蝦王旺餐餐掃清

本來諗住靠「福逸」增添多一場頭馬紀錄的高伯新，誰知遇上「美麗掌聲」縮程建奇功，要擺脫現時下游位置必須再要努力不可。今次夜賽，馬房手足透露高廄有兩駒是爭取頭馬重心，分別是「哈蝦王旺」與「年年旺」，這兩駒在近日午間均往機坪踱步，間中倉主亦會跟隨督操，埋門兩駒的狀態都非常對辦。更值得一提是這兩駒倉主都是特別小心照料，每日要睇報告，仄牠們的體溫變化，除此之外，更要仄食慾報告。「年年旺」每餐是餵十二磅半料，至於「哈蝦王旺」則要餵十三磅半，兩駒餐餐將飼料吃光，胃口是非常好。

年年旺等神蘇報名

「哈蝦王旺」上次初配周俊樂經已有第三名交出，倉主指周俊樂與其時辰八字夾，所以今次「哈蝦王旺」再度列陣續配此子披甲，希望他能為馬房帶來進帳。至於「年年旺」，神蘇上次因為此駒排檔差，所以未能跑入三甲，但未段亦告衝了一段近，消息指出，神蘇希望高伯新等他停賽完畢才報名，結果「年年旺」真的在蘇銘倫下次停賽期前遇適合賽程即列陣，高伯新當然甘願送出這個順水人情，今次呢匹馬排六檔，可望增添頭馬。

銀亮之星銼牙備戰

近期蘇偉賢對兩匹戰馬非常緊張，幾乎日日入倉都仄住，分別是「銀亮之星」及「醒目再臨」，周一午間，馬房安排牠們到機坪踱步，前者由副練阿撈考驗，後駒則用上馬來西亞籍騎馬人，踱步期間，倉主在欄邊睇到實一實，只見兩駒踱來生氣勃勃，於太陽底下照射，毛色是立立靚，令人喜愛。馬房手足透露，這兩駒近期均經過倉主悉心照料，埋門狀態才會起得如此理想。原來早前牠們曾經到過獸醫房接受銼牙治療，一般情況馬匹牙齒是自然增生的，當增生高低程度參差時候，馬匹食東西時便會感到不舒服，有時還影響了胃口，這兩駒經過倉主細心檢查後，早前已安排銼牙治療，如今食得操得，列陣便要留神了，而「銀亮之星」更是由何良馬房來投初出，立刻用史卓豐跑，顯然是急於求交代。

歡欣福星專人上閘

呂健威呢邊廂，有隻擂台躉「股票傳奇」列陣，今次馬房乘何澤堯停賽而換上莫雷拉，堪稱人強馬壯，除非今次又學上次咁起唔到步，否則都好大機會再贏。馬房除呢隻馬好大機會食糊外，仲同時搵咗「歡欣福星」及「勝利在手」配合出擊，後兩駒都有特別動態，「勝利在手」及「歡欣福星」近期好似孖公仔咁密密在機坪拍踱，前駒狀態經已復甦，後者狀態越磨越靚，據講「歡欣福星」並非千四咁短嘅馬，跑中距離係夠韌力支持，今次馬房部署跑一哩，有信心可以交出前列成績。上仗替「歡欣福星」披甲列陣之巴度，指牠情緒尚有急躁情況，假如入閘時候並非順順利利，將會對演出有影響，所以今次角逐谷草一哩，馬房經已一早向司閘員申請遲入閘，並要搵專人上閘，希望這駒在情緒安穩的環境下角逐，上述三隻呂廄馬，大家不妨諗諗佢。