「黃絲」成日都話「核爆都唔割」「齊上齊落」，但口中說不，身體往往好誠實。屯門區議員張錦雄就完美咁示範，只要對自己嘅利益有影響，話之你係「手足」啦，一律照「割」！

張錦雄早前搞咗個團購白米活動，因為民政事務處懷疑佢從中獲利，違反《區議會條例》，所以扣起咗大約23萬蚊嘅津貼。事件經過一輪審查，民政處前日就話活動無違規，並且會繼續處理佢嘅開支償還款額申領。

成功拎返津貼嘅張錦雄喺接受《獨立媒體》訪問時聲稱，自己之前舉辦團購有機農作物、蛋卷等活動都無俾人投訴，相信今次係因為活動聘請「手足」搬米，所以先會被投訴，搞到佢被扣起津貼咁話。經過今次呢件事之後，佢日後會繼續搞團購白米活動，但就未必會再聘請「手足」，只會搵居民義工幫手。

 為咗唔被扣起津貼同惹麻煩，張錦雄果斷咁自斷「手足」，呢種行為即時被人鬧佢無風骨，有事就同「手足」割席。咁又係嘅，如果同「手足」合作就會俾人投訴，又有機會俾民政處扣起津貼，聰明嘅人梗係識得點做啦！

呢件事真係再次證明，「黃絲」嘅口號都係信口開河，「講就無敵，做就有心無力」，而「齊上齊落」根本就係大話嚟！相信今次被割嘅「手足」知道自己被「用完即棄」，一定好傷心喇。

●香港文匯報記者 倪思言