【網議政事】亂屈銀行取消戶口 網民批梁芷珊無品

同「龍門」有生意來往，俾攬炒派中人「封」為「才女」嘅梁芷珊，日前喺facebook發帖自爆，恒生銀行send咗封信畀佢，話要取消佢兩間公司嘅商業戶口。一個月通知，停止運作，仲講到件事係「政治打壓」咁。有網民話取消戶口呢樣嘢並不罕見，佢仲要同網民鬥嘴，其間更連基本嘅事實交代都自打嘴巴，唔怪知得啲網民質疑佢發呢啲帖文嘅居心囉。

梁芷珊聲稱唔會問銀行停佢戶口嘅原因，但就係咁開始「造勢」，話乜銀行取消佢戶口「無向我哋索取資料及文件」「口頭回覆指乃內部審查」，話為咗「對抗打壓」唔會問「官方回應」，擺明要等人以為佢遭到「政治打壓」。佢仲要煽情咁話：「原本係香港人嘅銀行，唔服務香港企業。而（）家銀行唔係銀行，家不是家。香港仲做咩國際商業城市？」真係屈得就屈。

網民質疑梁有問題

佢嘥咗好多心機營造「被迫害」形象，但仍有唔少頭腦清醒嘅網民表示唔buy呢種講法，好多人就話呢啲係銀行正常做法。梁芷珊嘅「頭號粉絲」「Riley Walker」就話：「中小企成日都遇（到）呢啲情況……AUM唔夠大，又多細額cash出入，『大』銀行角度：賺埋都cover唔到做due diligence 嘅cost，送客好過。」「Choi TL」亦話：「一向銀行都好鍾意向公司戶口開刀，一來冇錢賺，二來太多AML野（嘢）跟，有殺錯冇放過。」

有網民就認為，根本係梁芷珊或者佢負責戶口嗰位員工有問題。「Angie Ma」話：「恒生（銀行）都有send信比（畀）我review個人戶口之工作及地址，附屬卡成員嘅個人資料也要update，佢之前有冇send信問你先？」「Peter Chan」就質疑：「銀行一直都會再問公司戶口擁有人的資料，只係你既（嘅）職員無係（喺）限期前回覆銀行要求。問下（吓）你既（嘅）員工先啦，係咪睇完無左（咗）件事呀？」

「Kenji Furuhata」更質疑梁芷珊「煲」呢件事嘅用心，問佢點解唔問官方回覆，而係公開講件事，「It's the customer relationship and business issue.（這是個客戶關係同業務問題）」

梁芷珊就好緊張咁反咬對方關注佢個帖文嘅居心，不過就唔小心反咗口話：「How do u know i did not ask an official answer？（你點知我冇問官方回應？）」咦？明明啱啱仲話自己好似「對抗打壓」唔會問呢？睇到呢度，個帖文係乜居心大家心照囉。

●香港文匯報記者 黃書蘭