日前美國國會示威造成4死慘劇，其中一人更係被警察射殺。一直聲稱所謂「反警暴」嘅攬炒派，潛逃到外國就反過嚟支持美國政府嘅「暴政」。前「香港大專學界國際事務代表團」發言人邵嵐仲喺社交平台向美國國會警察講「多謝」。唔少攬炒分子都鬧爆佢雙重標準，討好美國「新當權派」以繼續得到「金援」，叫大家唔好再俾呢啲「國際線」政棍呃。

喺美國國會慘劇發生之際，邵嵐喺自己嘅Twitter貼出「Thank you Capitol Police」嘅言論，唔少網民話佢黑心、泯滅人性。「熱血公民」成員鄭錦滿就喺facebook出post炮轟佢話︰「手無寸鐵，服役美國空軍14年嘅特朗普支持者Ashli Babbit被國會警察射殺，邵嵐仲會喺Twitter多謝Capitol Police。呢啲離開香港，用香港人眾籌嘅錢去打『國際線』嘅政棍，真心希望皇天擊殺之！」

fb專頁「白紙」亦忍唔住留言：「 泛民睇唔起泛民，直接揭露『國際線』的虛偽。老老實實，『國際線』不是視特朗普為救世主咩？人呢？梁繼平（港大《學苑》前總編輯，在修例風波期間闖入立法會後潛逃美國）系（喺）邊啊？」

「神駒」：為搲美水喪心病狂

「無敵神駒」仇思達都加把口：「有一名美國退役女軍人因為『追求真相同公義』，被警察亂槍擊斃，本應人神共憤！呢件人渣竟然話要多謝警察！為咗托拜登大腳，務求喺拜登上台之後，想盡辦法𢱑（搲）美國民主黨放水養活自己，呢班人已經喪心病狂。所有香港人應該醒覺，唔好再被呢班×人欺騙。」

被圍攻嘅邵嵐隨後心有不甘再發文「澄清」話：「美國示威者走入國會唔可以同香港入立法會比， 因為一個『為民主犧牲』，另一個就係『破壞民主』。」「神駒」就追擊佢話：「平時大大聲『遣（譴）責警暴』，今日就叫香港人唔好將美國同香港情況作比較，默許美國警察暴行。何解唔好比較？因為一比較起來，呢班友就會好尷尬。但明明之前同一班人，係會將香港示威者『佔領』立法會，同台灣『太陽花學運』比較。偽善。」

「Vicky Chiu」就質問：「其實真心想問是誰支持什麼『國際線』，不知所謂的一班人，見利忘義，香港靠這些人，吾（唔）怪得Hk冇運行。」「Roy Lai」話︰「繼續國際倒米陣線。」

睇返邵嵐前年11月接受《德國之聲》訪問時就曾經指香港黑暴分子「合理使用暴力」，仲話「和平示威者」是在「反擊」「保護自己」。當時指鹿為馬嘅佢，到底點解去到外國成個人當堂醒晒，識得多謝警察鎮壓暴亂呢？真係佢自己心知肚明嘞。

●香港文匯報記者 倪思言