【貴圈真亂】網民批眾「着草者」隔岸觀火

警方噚日拘捕多名參與「初選」嘅攬炒分子，指佢哋涉嫌違反香港國安法中嘅顛覆國家政權罪，原本全體尋求連任嘅鴿黨（民主黨）立法會前議員全部被捕，但上月已經先行潛逃兼退出嘅許智峯，唔知係想刷存在感定真係替前黨友擔心，喺fb出咗個只得5句嘅帖子，內容就係叫戰友同香港人頂住喎。有網民睇完就火滾，批評許智峯隔岸觀火，發生咁大件事都表現得咁敷衍，仲質問佢攞景定贈慶𠻹。

許智峯僅叫「頂住」

鴿黨去年聲稱經過仔細商量，決定由時任立法會議員嘅胡志偉、涂謹申、尹兆堅、黃碧雲、林卓廷、鄺俊宇同許智峯尋求連任，並參與「初選」，點知𠵱家全部涉嫌違反國安法。睇住前黨友被捕，留咗喺鴿黨近20年嘅許智峯就開post「表達擔心」：「英國的凌晨，收到香港瘋狂搜捕的消息，怎能安睡。戰友們頂住，香港人頂住！」呢寥寥幾句，已經睇得出前黨友喺許智峯心中嘅重量啦。

「香港眾志」前主席羅冠聰亦發帖，教留喺香港嘅「手足」「該如何回應『大搜捕』」，話要「勿陷於恐慌」「重整論述，準備應付輿論戰」「抱持希望、不再畏縮」咁話。

對於呢啲隔岸觀火嘅帖，網民「Siu Wai」就話自己大開眼界：「在許生心裡（裏）面諗，齊上齊落呢四個字用嚟講㗎咋唔係用嚟做㗎！今日真係學咗好多嘢！」「戴象」亦話：「隔岸觀火，出賣隊友，出完個post又可以再瞓過，話之你地（哋）班『手足』×街啦」。「Ed Lo」就話：「你應該立即到唐寧街10號要求約翰遜表態支持香港人！」但「Chan SK Tim」就笑言：「人哋識佢老鼠咩！」

張國鈞揶揄不敢回港

想刷存感嘅又點止許智峯？去年8月已經着草嘅前大專學界國際事務代表團發言人張崑陽都喺fb開post，聲稱香港面對「有史以來最大規模打壓」「需要各位全民歸位」，仲疑似隔岸煽動港人：「當幾乎所有『民主派』人士全部被捕，剩下的我們就要加把勁做事了。」

民建聯立法會議員張國鈞就發帖揶揄：「 大家估吓已經走咗佬去咗英國嘅張崑陽、羅冠聰同許智峯會唔會歸位返香港？」民建聯立法會議員陳克勤亦恥笑：「成堆『手足』喺香港犯法被拉，自己就喺英國High Tea，仲要講風涼話。我真係搵唔到詞彙去形容你地（哋）。」民建聯立法會議員陳恒鑌就「勞氣」話：「點解可以咁可恥！咁有心就返黎（嚟）一齊面對啦！」佢仲喺帖度標注「齊上齊落只係一個口號」呢一句。

網民「Queenie Leung」亦質問呢班人：「歸位？你幾時返香港？」「David Pau」亦批評：「你上年國安法實施冇耐已經着草，仲要唔聲唔聲，你有咩資格叫人歸位？」學聯前常委張朗軒就幫張崑陽「護航」：「佢有位歸呀，歸去fb囉，求其講幾句容乜易？」●香港文匯報記者 雨航