訟黨稱不送頭 網民圍插怕死

梁家傑自詡「保留實力」 攬炒派：早啲收山唔好獻世

攬炒派慣用「精人出口、笨人出手」，等佢哋攞夠着數後就講幾句場面話全身而退，理得其他人死活。公民黨主席梁家傑日前接受傳媒訪問時話，香港國安法生效後，佢已經兩次拒絕歐洲或美國邀請嘅網上對談，稱有啲事可免則免，又話「與其送頭或硬碰，不如保留實力，低調點」喎。不過，唔少攬炒派就瘋狂圍插佢「怕死」，叫佢早啲退休收山，公民黨亦唔好繼續獻世喎。

●香港文匯報記者 郭家好

梁家傑接受now新聞台節目《大鳴大放》訪問時提到，自香港國安法生效後，佢已經兩次拒絕歐洲或美國邀請嘅網上對談，仲解釋話係驚對談時有其他人講咗啲中央唔啱聽嘅嘢，俾人覺得佢唔出聲係「默認」喎，所以就「可免則免」啦，以後公民黨都會「低調」啲。

其實要低調，咁不如直接解散成個黨，咪更低調囉？但梁家傑認為，公民黨喺社會上仍有一定嘅支持者，𠵱家唔至於完全冇運作空間嘅情況喎。

梁家傑形容，呢個做法係唔「送頭」唔「硬碰」，喺攬炒分子眼中其實係「怕死」「縮沙」。2019年「7．28」上環暴亂中被捕嘅湯氏夫婦開嘅fb專頁「赴湯」都留言叫梁家傑：「退出政壇為香港做返件好事啦……」，甚至特登開post揶揄佢，係咪所有違反香港國安法嘅事都唔會做，「唔知如果話『唔自殺會犯（香港）國安法』佢會唔會第一個自殺？」

攬炒諷訟黨「保命走佬」

唔少攬炒派亦針對「保留實力」呢一點攻擊梁家傑。「Lulu Shout」質疑︰「你都訓左（瞓咗）十九幾年，仲有咩實力可以保留？」

「Taylor Chan」揶揄公民黨係諗住「保命走佬」，「保留實力，低調移民。」

「Charles Wong」寸公民黨所謂嘅「國際戰線」都係呃人，「保乜嘢留實力？說好的『國際戰線』呢？」

「Tony Cheng」就直擊公民黨要害︰「想指（請）教一下公民黨本身嘅實力係咩？」

要求公民黨索性「摺埋」嘅呼聲都好強烈。「Matt Jlt」直言︰「低調？咁公民黨仲有乜用，不如摺左（咗）公民黨佢啦。」「Paul Leung」明言︰「不如話泛民『抗爭』工作正式完結，收工，可以各自返屋企啦。」

「Shunshun Shun」就鄙視公民黨「搵夠上岸」嘅行為，「公民黨食夠人血饅頭啦，而（𠵱）家帶頭跪。」

「Eric Eric」則認為︰「『公文袋』（公民黨）策略：精人出口，笨人出手，一向如是。」

「Andrew Yu」揣測梁家傑嘅心理，「梁大律師明嘅明嘅，你都係既得利益者，搵啖食啫唔使攞條命去博。」

張國鈞譏梁「氹人落疊」

唔止攬炒派睇唔起梁家傑嘅言論，建制派都一樣睇唔起佢。民建聯立法會議員張國鈞亦轉發有關圖文，加埋「識時務者梁家傑」嘅抵死標籤話︰「氹人落疊嗰陣就話齊上齊落，結果幾多人因為咁搞到坐監嘅坐監，着草嘅着草……而（𠵱）家燒到去自己嗰疊就識得話唔好送頭。」