乜嘢叫利字當頭，睇「黃圈」實會明。專食人血饅頭嘅「黃店」阿布泰國生活百貨老闆林景楠日前喺facebook宣布，本年內全面撤出同樣被界定屬於「黃圈」嘅HKTVmall旗下網購平台，臨走前仲呻自己喺呢類平台等於「白做」咁，擺明今次事件又係因為錢。唔怪得啲網民揶揄「黃圈」，有錢就講「良心」，冇錢就講黃金，「齊上齊落」？食得㗎咩？
呻HKTVmall成本高如「白做」
成日標榜要打造「黃色經濟圈」嘅「黃絲」，𠵱家成日睇住個「圈」因為「兄弟」爭利益而分崩離析。HKTVmall今年平台交易額大增，公司開業5年首錄盈利，點知即刻有「同路人」踩返腳。
林景楠日前喺facebook宣布撤出包括HKTVmall在內嘅香港網購平台，仲怨聲載道咁話：「如果大家想容易些去理解我們的想法，由HKTVmall（1137）的股價可見一二，4月4蚊，8月8蚊，12月升到12蚊。……當網購潮流的確被1137（HKTVmall）帶起，而作為中小企或者小店……利潤往往不足以去覆蓋（成本），簡稱『白做』。」
一石激起千層浪，唔少人都順勢鬧HKTVmall呢個「黃平台」。「Priscilla Lully Luk」咁話：「HKTVmall其實食水深，對啲中小型舖頭仔唔着數。」「Ivan Wong」咁講：「支持退出，其實王維基（HKTVmall創辦人）頭頂個光環應該逐步逐步俾人拆返落嚟，記得當初聲稱反對百佳、惠康等超市的『霸權主義』，但係自己一步一步壟斷市場，逐少逐少扼殺微商或小商戶生存空間。」
網民譏為黃金無良心
但唔少人同樣唔buy林景楠。「Zoe Ha」就話：「其實阿布賣得好貴好無，經開會行下但無樣買得落手……」「Alan Luki」則揶揄林景楠：「要養『手捉（足）』嘛，梗係要賣貴啲啦，課金啦！」 「Lola Lam」更直言：「食人血饅頭食到飽啦人地（哋）。」
唔少「黃絲」仲以為啲「黃店」做生意真係為咗「良心」，事實上，呢啲「黃圈」嘅爭拗邊個唔係為咗錢。「Vi Vi Kc」就心水清：「要出名就講『良心』，要找數就講黃金。你唔係真係以為生意人會講良心吓話。」
「蔡嘉俊」就話：「睇到香港冇利可圖，咪走人，俾（畀）少少甜頭就話『良心企業』，低能！」 ■香港文匯報記者 黃書蘭
評論