【網議政事】劉康戶口被凍結 借題賣慘得啖笑

因為涉嫌違反香港國安法而被警方通緝嘅「香港效益主義黨」主席劉康早前着草英國，佢噚日喺facebook發帖話自己嘅中國銀行賬戶被終止，覺得件事「唔可以容忍」，又聲稱事件「損害香港金融中心聲譽」喎，但原來佢戶口只得50蚊唔夠，而銀行早就叫咗佢去結清戶口。啲網民見佢吹到咁大，就叫佢不如返香港追討，畢竟損失咗50蚊咁「大鑊」喎。

逾期結清賬戶 損失47.23元

Facebook專頁「每日關心劉康被通緝狀況」噚日發帖話，中銀喺今個月24號終止咗劉康嘅銀行戶口，個戶口有47.23蚊。劉康話件事係「侵犯香港人嘅私人財產」，於是又大叫國際「制裁」。講到自己咁委屈，原來銀行早就通知咗劉康佢違反條款，要佢喺今個月24號前去結清賬戶，只係佢冇做到啫。

網民「David Chan Tai Wai」話︰「只有50元，證明當事人已經將其他款項提出來。明知道政府可能涷（凍）結戶口，就在櫃員機將所有款項提出來，50元提不出來，就用這50元大做文章罵政府『政治打壓』。」有網民則話︰「通緝犯銀行戶口被終止好正常喎，唔通俾（畀）你繼續用嚟收黑金咩。」「普通用戶」就覺得佢「扮可憐」應該係「又想眾籌呃錢」。「ASIS」就呼籲佢不如「回港再講」。 ■香港文匯報記者 文根茂