「黃媒」吹捧下，博上鏡嘅人都可以有「光環」，認真反智。早前被爆性騷擾「女手足」、成日拎住《蘋果日報》一人「和你Lunch」嘅「Lunch仔」李國永，日前喺facebook發帖話自己「返咗深圳聲援十二逃犯」，仲走咗去食海底撈，唔少「黃絲」腦都唔用就信咗，點知隨即就俾網民踢爆佢係偷圖呃人。搞到同路人炒晒車，唔少「黃絲」都鬧爆「Lunch仔」，仲要求佢關fb專頁同消失。

稱返深圳聲援「十二逃犯」

「Lunch仔」日前喺fb連發多帖，稱自己「返咗深圳聲援十二逃犯」，仲話自己由西九龍高鐵站坐高鐵入境內地、「成功申請用緊急情況申請豁免14日檢疫」、「到左（咗）深圳香格里拉大酒店休息」、「去左（咗）食當地駐（著）名嘅海底撈」云云。呢啲言論真係稍稍用腦都知佢亂噏，偏偏有啲「黃絲」仲信咗。

好在，都有啲「黃絲」發現「Lunch仔」大話連篇，踢爆佢只係偷圖貼上fb扮返內地抗爭。fb「黃」專頁「紅白藍孩 RWBB」就發帖鬧「Lunch仔」:「祭壇前玩汽水、上『藍屍（絲）台』R（搲）曝光、同×警握手言歡、入中大鬧女『手足』係雞、阻人送囚車，一直忍口唔出聲×呢條×腸，但呢鑊真係要爆。我×你老×，高鐵停駛咗，你搭乜×？短袖衫+冇口罩？公安會因為你聲援『12港人』俾（畀）你免檢疫？消費『12港人』嚟宣傳你個星級抗爭團隊？乜×嘢feeling happy（覺得開心）食豪啲？你幾時香呀？唔好同我講咩維持抗爭熱度，條×腸一日唔道歉關page（專頁）消失都冇資格要人用『不分化』嚟開脫。」

「黃絲」不忿被呃促摺埋

有人講到「Lunch仔」臭史鬼咁長，唔少啞忍多時嘅「手足」都終於出聲，後悔自己一直盲撐佢。「MJ Tom」話：「一開始，應該好多人欣賞佢，但之後發覺唔多對路想××佢。但而（）家×都慳番（返），因為原來佢真係『白咭（卡）仔』。」「Cl Fy」就話：「一開始覺得佢做得好好，越嚟越不知所謂，而（）家感覺只剩刷存（在）為出位。」「Andrew Lau」則覺得：「呢條友肯定收錢做嘢個（嗰）種……」

有「黃絲」就揶揄班成日話唔分化嘅「黃絲」終於醒覺。「Wally ArtChin HutSick」講晒反話︰「有冇搞錯呀，『手足』做乜都係啱，各自爬山關你×事咩，又話不割蓆（席），不鬥『黃』，不篤灰，不捉鬼？『手足』做乜都係啱！」

有網民就覺得令「手足」盲撐傻仔嘅罪魁禍首係「黃媒」。「Wallace Tsoi」咁話：「係《蘋果》同《立場》係咁俾（畀）光環佢。」■香港文匯報記者 黃書蘭