涉嫌棄保潛逃嘅民主黨前成員許智峯，喺早前接受另一攬炒派立法會前議員朱凱廸訪問時聲稱，佢屋企人同自己嘅信用卡資料「突然消失」，家用唔到信用卡，質疑係被「政治報復」。唔少網民揶揄，佢之前假借「職務外訪」呃法庭畀佢攞返護照，然後就走佬丹麥，根本「冇信用，何來信用咭（卡）」呢？

「自己友」間接踢爆講大話

網民咁講又有道理嘅，許智峯畏罪潛逃，俾人踢爆多次講大話已經唔係第一日嘅事。早前，佢聲稱自己同家人嘅銀行戶口被凍結，被警方以涉嫌違反香港國安法同洗黑錢方向追查。許智峯當時回覆傳媒查詢時聲稱，暫時發現家人有部分滙豐銀行戶口再被凍結，更聲稱涉及嘅總金額高達數百萬元喎。

不過，警方其後即刻踢爆，警方凍結嘅戶口金額只係涉及港幣約85萬。就連佢「自己友」《蘋果日報》之後亦引述消息指「許智峯曾經提及家人的恒生及中銀戶口受牽連，但據悉到目前為止，其父母在該兩間銀行（的）戶口從未被封鎖，目前如常運作」，咁咪即係間接踢爆許智峯講大話囉。

有網民分析，許智峯潛逃後已經「失聯」，無咗固定聯絡住址同聯繫方法，銀行停用所有信用卡係保障財務機構避免損失嘅正常做法。如果許智峯真係咁想用信用卡，有人就支持佢返嚟香港「解凍」啲信用卡喎。

又走數又講大話，大部分網友都對許智峯負評兼派嬲嬲。「Dong Dong」直言：「信用卡係留俾（畀）有信用的人用㗎。」「Siuying Wong」就話：「潛逃犯仲有乜嘢信用可言。」「Ken Man Man」亦質疑：「犯人仲可以用信用卡？」

有網民見許智峯又講自己「莫財」，就話佢都係想再搵「黃絲」眾籌、等佢有多啲水腳啫。話時話，許智峯成日搞眾籌，唔知啲錢去咗邊呢？

■香港文匯報記者

倪思言