政府近日推出感染風險通知嘅「安心出行」App（流動應用程式），不過，就被別有用心嘅「黃絲」抹黑為「全民監控」「限制自由出入」，仲有「黃媒」引述「IT專家」稱，政府或可藉程式提取市民嘅敏感相片喎。fb專頁「政治大嬸判」近日就對比咗「安心出行」同「蘋果動新聞」兩個手機App要求嘅存取權限，結果發現「蘋果動新聞」App原來「更勝一籌」，唔止有「IT專家」所講嗰種可提取用戶手機相片嘅功能，仲可以讀取埋用戶嘅通訊錄、位置及手機狀態，唔知咁驚資料被外洩嘅「黃絲」知道咗會有咩感受呢？

《立場新聞》早前搵咗華爾基利信息安全研究組織嘅電腦安全研究人員分析「安心出行」，承認「安心出行」個App索取嘅權限唔多，不過，當中有讀取、修改或刪除SD卡嘅內容嘅要求，所以「如果市民相片有敏感內容則『要好小心』，因為喺程式權限下政府仍可取得照片」云云。

質疑「睇新聞都拎咁多權限」

「政治大嬸判」就發現，原來「蘋果動新聞」一樣有呢項權限要求，甚至索取較「安心出行」更多嘅權限，包括手機通訊錄、位置、手機狀態及識別碼：「IT磚（專）家話『安心出行』個App好危險！咁我想問吓IT磚（專）家《蘋果》個App危唔危險？點解睇個新聞都拎咁多權限？」

網民「Bill Ip」就揶揄：「『安心出行』都話擺明車馬要知道你去過咩場所，你睇下（吓）某報既（嘅）Apps？唔知道我以為入咗FBI探員專用Apps呀。」「Phoenix Leung」就建議：「取咁多權限，不如比（畀）埋部手機《蘋果日報》啦！」

「William Sze」就好似想為「黃絲」護航：「咁驚就唔好用智能電話啦傻仔。」「李小男」亦試圖合理化件事：「有邊個App係唔需要呢d（啲）權限？」「Kitty Mok」即刻反問：「咁點解要話『安心出行』有問題？」「Michael Chen」就回應話：「yc（『黃絲』）一向雙標，畀晒啲資料《蘋果》都仲得啦。」 ■香港文匯報記者 雨航