「黃客」食飯慘變「速食賽」 投訴反遭起底約「傾偈」

食個飯都會俾人起底兼踩上門，冇錯，「黃店」就係可以咁癲咁囂張。有個女顧客喺facebook「黃谷」開post，話陪個仔去「黃店」「大統領」慶生，點知每食十分鐘就俾人催一次，好似趕住去投胎咁，最後食咗50分鐘就要埋單走人，反問係咪「速食比賽」。之後唔少網民都留言話有類似經歷，但更離譜嘅係個店主竟然直接踩上事主屋企要約佢傾吓件事，唔少網民都鬧爆「大統領」惡過黑社會，仲毫無悔意，網民呼籲大家罷食。■香港文匯報記者 郭家好

名叫「Kiki Lam」嘅事主日前喺fb發帖，話佢個仔16歲生日，本身想好好地陪佢去粉嶺「黃店」「大統領」慶生啦，但7時42分到達店舖後，30分鐘之後就催一次，40分鐘再催一次，50分鐘之後話佢哋已經食咗好耐，要佢埋單即走，成餐飯食咗唔夠一個鐘，事主都忍唔住問網民︰「到底以北區標準，正常出街食個晚飯，限時幾多分鐘？速食比賽？我從未食過咁趕、咁受氣（嘅）生日飯……一個鐘內離開，你都仲可以指責我？」

之後，事主打去「大統領」，想同個老闆講「良心」，然而當晚催佢埋單嗰個中年女士就話自己係老闆，解釋當日趕佢係因為外面有人訂咗枱喎，講咗幾十秒就收線，後來又打返畀事主開佢波，話知道事主抹黑佢喎，真係惡到霸氣外露。

事主一度諗住叫埋班網民去「大統領」「反映意見」，「大統領」都擺出一副放馬過嚟嘅姿態，事主結果就話當日小朋友病咗所以放飛機。

以為件事告一段落，但「大統領」個老闆竟然搵到事主地址，仲踩埋上門問事主幾時約時間傾吓件事，真係十級驚嚇。據事主講，當日晏晝「我一家食飯，你可以帶人入我屋企，企我飯枱邊？起底好叻？今次係我食午飯，如果下次我冲（沖）涼你又打算自己入屋？」事主話將會搵律師申請禁制令，禁止「大統領」發放佢家人嘅任何資訊。

「黃店」辯稱「被邀」上門冇人信

不過，「大統領」就以一副敷衍嘅態度道歉，但對自己踩上門一事毫無悔意，話係「既然聯絡到老板（闆），事主咁忙邀請老板（闆）去面談，我都叫左（咗）佢放心拍片，我唔會錄佢既（嘅），我只會錄音」，所以「被邀請」上事主屋企喎。但根據相關片段顯示，疑似「大統領」老闆嘅人係企喺閘門外呼叫事主，一啲都唔似「被邀請」喎，「大統領」呢個解釋係咪太牽強呢？

事主就話︰「佢哋無可能咁樣上門～我食個飯咋喎……今次企去（喺）飯枱邊～下次呢？好似要上門拉人咁。」後來，「大統領」老闆就事件再次出道歉聲明，但就死雞撐飯蓋地話當日踩上門嘅原意係想同事主道歉，點知再次「被誤解」喎，又稱瓜田李下再多正確嘅理由都於事無補，呢啲咪就係「黃店」之所以為「黃店」嘅底氣囉。

連網民都睇唔過眼「大統領」咁囂張，「Leanne Wong」狠批︰「真係好搞笑囉，居然話事主『邀請』你去人地（哋）屋企，如果係真應該請你入屋坐，比（畀）杯茶你飲啦！」「Tai Man Chan」亦話︰「哇起人底仲要未問過人走去人地（哋）屋企，呢個似恐嚇多啲喎！」「Nga Nga」就話「開舖頭開到好似黑社會咁，不知所謂。」唔少網民都叫大家罷食「大統領」，等呢啲劣質「黃店」執笠喎，唔知其他劣質「黃店」驚唔驚呢？