「黃店」勞資糾紛 發千字文互插

「黃店」嘅醜聞真係爆完一單又一單。嗰邊「光時」肥上瘦下仲俾人鬧緊，呢邊「黃店」「豚道樂」又爆出拖欠薪金。攬炒派勞工團體「勞工組」前晚就踩上「豚道樂」嘅分店、開住直播幫個前員工追討人工，做到咁激，「豚道樂」都即場畀咗現金，但噚日凌晨就打千字文，數返個員工臨時劈炮唔撈，工作態度有問題，又唔留戶口資料，事隔成年突然又要追返份糧。其實個員工冇責任感，個僱主卸膊，大家打和咪算囉。

「勞工組」話早前收到求助，話有「手足」舊年年尾喺「豚道樂」返咗兩日工後轉工，事後想搵朋友幫手攞返份糧，「得到回應係做得兩日唔做所以唔會有人工」，個「手足」一度放棄追討，後來因為實在有經濟困難，所以近日搵咗「勞工組」幫手追人工。

「勞工組」直播上門代追薪

「勞工組」於是打畀「豚道樂」，「豚道樂」一開頭聲稱要去總店或者搵勞工處約交收支票，但「手足」要返工就唔到個時間，「豚道樂」向「勞工組」數落完個「手足」一輪，終於肯話就返「手足」時間畀佢攞支票。

不過，當手足覆返朝早11點前同夜晚12點後先得閒，對方就冇再理佢哋，最終「勞工組」前晚決定開住直播去荃灣店攞糧。

玩到咁大，網上都一地花生。網民「Soph Yukaka」標註「豚道樂」話︰「快啲轉帳（賬）出糧咪無事囉，『黃店』請『手足』都要找數架（）！我平時都有幫襯開，但再唔找數『黃』都唔會幫襯你！」

「豚道樂」果然當晚就畀咗現金個「手足」，但轉頭喺凌晨出千字文，鬧爆個員工舊年12月返咗兩日工，第三日喺返工3分鐘前辭職，然後冇留低戶口資料，今年1月追討薪金時，俾店家問返佢通知期同制服，結果就消失咗。

直至今個月，個「手足」「突然」再追糧，店方就要求「手足」喺上星期二、三或五其中一日嘅下晝3點到5點半之間親自簽收喎。個「手足」去唔到，一度兇佢哋一係過數、一係勞工處見，結果店方就要求佢喺勞工處簽收，最終就出現踩上門攞欠薪件事嘞。

講完事情經過，「豚道樂」反問「開工3分鐘前先通知唔做兼當日no show（唔出現）又是否一個正確嘅工作態度？」「我哋係咪要打鑼打鼓求對方黎（嚟）？定係要送埋上門先夠誠意？」

「黃店」唔忿氣力數「手足」

「豚道樂」篇文一出，風向又倒返去幫「豚道樂」。「VeronicaCarmen Lup」狠批︰「而（𠵱）家啲年青（輕）人真係好無交帶（代）。」「V Antonia」鬧︰「勞工組做事方法如同爛仔收數，完全不符合情理法。」

不過，「勞工組」都識寫千字文，噚晚就出咗篇「最終回應」，指出個「手足」「無家可歸、傷患要覆診、之前仲『坐咗半年』，出嚟要搵工交租，經濟拮据，身上嘅錢夠返工唔夠收工」，用悲情牌打返「豚道樂」。

佢哋仲寸「豚道樂」話，既然金額冇爭議，擺張支票喺分店俾（畀）人拎，或者搵中間人交收，「其實真係可以好簡單。」

至於嗰個「手足」嘅種種問題，「勞工組」就話︰「我地（哋）唔會考慮個事主係唔係一個合乎所有『完美受害人』嘅條件嘅人……權益還權益。工作表現還工作表現。」

其實呢件事，個「手足」冇交代、店家又卸膊，咪當打和囉。 ■香港文匯報記者　甘瑜