【貴圈真亂】「黃民」只看顏色 懶理「黃店」炒「手足」

所謂「一入黃圈深似海」，不斷有「黃店」老闆屢被爆待薄「手足」，然後又有老闆投訴「手足」工作態度惡劣。黃店「古月聚台灣古早味美食-元朗店」有員工指控該店老闆去世、店舖由其親屬接手後，就「炒晒啲舊員工」，仲話俾人拖欠遣散費。店方就反擊話接手後只係炒咗一個人，仲鬧對方係講大話抹黑。唔少「黃絲」網民就唔問其他，先問該店仲係咪「黃」先至決定再幫唔幫襯，正正反映「黃絲」不問是非，立場行先嘅態度。

古月聚被指拒付遣散費

該間引發爭議嘅元朗古月聚，其東主鄭國濱喺上月去世，店舖就由其弟弟等親屬接手。自稱喺該店打咗一年工嘅「Jeffrey Tang」（鄧子軒）其後喺一個黃色fb專頁發帖，話自己喺10月5日突被告知舖頭有新股東加入，所以要將舊夥計全部遣散，「事出非常突然，並冇任何先兆及通知期，本人一家大小生計全靠這份工。現時經濟環境非常惡劣，在如此倉猝情況下被遣散，本人一家都感到非常徬徨 本人深信鄭（國濱）老闆在世時不會做出如此冇人情味的決定。」

佢仲直指接手該店嘅鄭國濱細佬，從來無參與其兄以「黃店旗號」營運等決策，「老闆生前樂於助人，支持『抗爭運動』既（嘅）努力，佢地（哋）係無功勞的，如果佢地（哋）仍以黃店自居的話，我懇請各位街坊三思是否仍要支持此店。」

有其他自認係古月聚前員工就留言爆料話，該店炒人後，仲唔肯畀遣散費，仲話對方只係兼職員工所以冇呢樣嘢喎。「Jeffrey Tang」就喺該店嘅帖子中留言話：「肯賠錢未呀，WhatsApp 左（咗）你喇，咁勞工署（處）見啦！」

成班「黃絲」就狠批古月聚。「Yuki Lam」話：「炒曬（晒）前員工，咁無良，就算係黃店都唔會幫襯。」「Tai B Chan」稱：「真係憤怒，台灣老闆可能好多隨便扣糧又炒人不賠償，但呢度係香港，理直氣壯話已經比（畀）左（咗）待遇你就唔需要出代通知金，將劣質文化帶入黎（嚟）。」「Bellavalen Leung」就稱：「講法例時走去講黃藍，講個（嗰）時有無派口罩時幫過乜，都痴（黐）×線！」

店方反批前員工扮「黃」

古月聚日前就喺fb發表聲明，話有人指稱炒晒「黃員工」一事「完全是誹謗，從沒此事發生，不信者可親自去觀察」，並指稱被炒者只是因為品質與人品問題，店方請他不用上班。該被炒者「根本不是黃，而是說過討厭『黃色經濟圈』的人」。

該店仲話，現在工作大部分都是現有的舊員工和「手足」，同時再新聘一些人以代替老闆位置，並稱會追究有關人等的法律責任。但係，唔少「黃絲」就追問店家仲係唔係「黃」，仲質疑對方嘅回應含糊不清。

「Jair Tsou」就留言撐店家：「既然該店與各位同一陣線多時，突然引發的轉藍疑慮是來自部分人士轉發多個群組並無理無據的（地）標明藍店，分化、鬥黃，就在無形中醞釀，最後得利的是誰，思考一下這個問題就好，不要誤傷了同路人。」「Ivan Lamarche」揶揄：「所謂黃員工最好唔好炒，佢地（哋）代表真理，亦十分團結自成工會，你炒佢等於炒自己。質去洗廁所等佢自己走啦。」 ■香港文匯報記者 陳川