【網議政事】又有黃民插「黃店」 圖文並茂超難食

「黃絲」向來追求「食理念」，明明「黃店難食」已經係反覆驗證嘅道理，佢哋日前又搞咗個「支持黃店日」，不過，隨意望吓都見到網上有「黃絲」中伏哀嚎。有網民喺facebook出post，怒貼喺「黃店」買嘅寒酸兩餸麵同兩粒芒果椰汁西米露，嬲到問間「黃店」︰「大家都係搵辛苦錢點解你要咁樣對同路人！」

「黃色經濟圈」愈撈愈縮，前日借啲意搞咗個「支持黃店日」，又叫啲「黃絲」出嚟獻血汗錢。網民「Mei Cheung」就喺「黃絲」fb群組「我食在元朗。你卻在大牌檔」出post，貼咗自己喺某「黃店」買嘅麵同糖水，直言係「最唔滿意嘅一間」。

睇返啲相，26蚊嘅麵連便利店質素都冇，得兩粒燒賣同兩條芝士腸咁大把，仲要只係畀咗把刀做餐具，真係將劏客嘅理念表現得出神入化。另外嗰碗38蚊嘅芒果椰汁西米露，「Mei Cheung」形容係「西米水溝椰汁加兩粒就嚟爛嘅芒果」，佢嬲到話︰「一定會入黑名單呀！以後都唔會再幫襯囉！仲有唔該唔好打住黃標俾（畀）啲垃圾人食！大家都係搵辛苦錢點解你要咁樣對同路人！」

雖然「Mei Cheung」冇開名，但似乎唔少人都中伏甚深，睇圖已經記返自己嘅不快經歷。「Zoe Tung」話︰「上次入到門口，個男職員睇住我，都扮睇唔到，無反應。依（𠵱）間唔止野（嘢）食差，態度衛（衞）生都差（講嘢時都有啲蚊仔蟲仔附近飛緊）。」

唔少人都話間嘢離譜、劏客，「本來無一物2」話︰「好心唔識整野（嘢）食就執××左（咗）佢啦！成×日用黃店個名呃飯食，×你老×當人冇味蕾架（㗎）咩？」

但亦都有人幫佢開脫，質疑係外賣員「偷食」兜嘢，仲話試過堂食冇問題。「黒澤 ルビィ」就留言話︰「呢間之前堂食都離譜，以為睇唔起我哋幾個學生先唔so（騷）我哋，點知之後先知好多人都有同樣經歷……食物質素中下，唔叫太差啦但一定唔係好食。但店員態度再係咁差遲早玩完告幾多次急都無用。我哋幾位學生去，全埸（場）兩枱人，menu（餐牌）都要叫三次先理人。」

「JanetNet Hui」亦鬧間舖「求其出啲垃圾比（畀）人，但係打住良心排頭做生意」，仲貼埋自己之前想向呢間舖訂蛋糕，但俾佢已讀不回嘅信息截圖出嚟，正式開埋間舖名，原來叫「原點」。

呢件事仲由fb鬧到上連登，自稱係店主之一嘅「Chow Tsz Hin」就留言話：「唔想用太多藉口，係運送過程定點樣。」佢仲邀請「Mei Cheung」去舖頭免費試食，一副唔同人計較嘅口吻，最後店主仲話︰「我都希望大家支持所有『黃店』，因為每一間小店都係好努力用心經營，不斷咁捱過重重難關。」

苦主：講得幾冠冕堂皇都冇用

「Mei Cheung」就留言以正視聽︰「運送過程中，原（完）全無打瀉，包裝亦好乾淨。……賠償就唔使啦，我希望你真係真心去正視你舖頭嘅問題……喺度講得幾冠冕堂皇都冇用。」

「Livia Tang」亦留言杜絕用外送做藉口，話自己上次叫咗個芒果西米露都係好難食。「Zoe Tung」標註埋個店主重申︰「唔好講到淨係外賣有問題咁，堂食都好有問題。」 ■香港文匯報記者 甘瑜