■「Lunch仔」與接信警員握手,即被「黃絲」圍插。 fb截圖

近日成為「手足」共同攻擊目標嘅「Lunch仔」,再次成功為自己製造多一個藉口俾人圍插。事緣佢去警總交請願信時,俾記者影到佢同接信嘅警員握手,令網上一班「黃絲」激到扎扎跳,瘋狂辱罵佢做得唔啱,聲嘶力竭地問佢係咪有病。受到「千『絲』」所指嘅「Lunch仔」一開始單純話握手只係基本禮貌,叫大家唔好咁苛刻,後來唔知係咪轉性,突然間又道歉,真係離奇。

岑敖暉廖偉濂插埋一份

本身握手係一件好正常嘅事,但「Lunch仔」披住一身「光環」做呢件事就即刻踩中「黃絲」條尾,感覺佢哋被背叛。「抗爭派」荃灣區議員岑敖暉話「呢位『握狗男』真係好癲」。攬炒派網民「Vagari ON」激動地問,「到底咩人會同『仇人』握手?」又指「Lunch仔」不斷消費死者,但遇到任何批評時就會叫人唔好咁「苛刻」,即係講一套做一套,嬲嬲豬咁話。

前「香港眾志」常委廖偉濂又加把口,稱本身唔係好想理呢件事,但今次真係要爆喇,「如果你私底下對住班『狗』搖尾乞憐,無鏡頭影到嘅理×得你……眾目睽睽之下就唔該你唔好咁×…你豁得出去做公眾人物,就唔好怪公眾對你苛刻…所以,×少陣 OK?」

面對眾人唾罵,一開始「Lunch仔」死口話握手只係基本禮貌,仲叫大家對佢好啲,「希望大家不要太苛黑(刻)」,好唔順氣咁樣。後來,唔知發生咩事,突然又轉口風話「無可否認握手今次做法的確唔係太理想,係(喺)度講返聲抱歉」。

不過,網民就好似唔多接受「Lunch仔」嘅解釋,「Jason Cheung」話「今次真係幫唔落」;「Loijn Gbjjngf Hbnjtvbn」質疑「立場蘋果不停吹捧佢唔知為乜」;「Peter KY Lau」話「一句無眼睇」。但都有網民叫人唔好咁「苛刻」。「唐卓朗」道出「黃絲」本質,「其實唔小(少)『黃店』都消費緊死者嫁()啦,香港人甘(咁)好呃」﹔「Sze Man」問「嗯……唔通佢要比(俾)人滅聲被失蹤,然後一堆Rip先至叫係『手足』?」 ■香港文匯報記者 郭家好