不問自取嘅人通常面皮極厚，因為佢哋巧取豪奪之後仲可以振振有詞，講緊嘅又係民主黨(鴿黨)班立法會議員囉。事緣鴿黨近日喺公屋派咗幾十萬份宣傳單張，大講佢哋延任對社會嘅「好處」，奇就奇在成份單張都係引述黨外人嘅言論，更估唔到前「香港眾志」嘅羅三七(羅冠聰)都為鴿黨「撐場」，莫非佢哋已有共識?羅冠聰嘅同夥黃之鋒噚日就喺facebook大踢爆，原來鴿黨引用羅冠聰言論前並冇通知對方，有「抗爭派」中人隨即大鬧鴿黨為咗延任「無所不用其極」，但有網民就寸返「抗爭派」：「張單張有冇扭曲聰(羅冠聰)講嘅嘢先?」

黃之鋒喺fb上傳有關單張，大鬧鴿黨非常離譜，問都唔問就登咗羅冠聰嘅大頭照同言論，令大家誤以為羅冠聰支持議員延任;另一「抗爭派」分子岑敖暉亦轉載帖文，批評鴿黨為咗延任，「實在是無所不用其極。」

林卓廷反駁稱引用係常態

鴿黨林卓廷就留言反駁，話從政者討論重大公共政策時，成日都會引述其他政客、議員、官員同學者嘅意見，關鍵係準確引述，而羅冠聰確實講過「進入與否都不會引來國際的反彈......不會有任何國家政府、政客因為『民主派』延任一年，或者全面杯葛，而轉變香港以及中國的態度。」

 

不過，林卓廷最後都戴返個頭盔話，引述羅冠聰嘅言論只係解釋延任會否影響國際聯繫工作，唔涉及對方係咪支持延任喎。

被擺上枱嘅羅冠聰就大呻鴿黨今次令佢好難堪，因為佢當時發表有關言論時已經將個人立場寫得好隱晦，言論亦非針對「民主派」應否延任，但鴿黨今次咁樣引用，又用埋佢嘅大頭照，隨時令讀者將佢同鴿黨嘅立場睇齊。

鴿黨單張自己名字超細隻

香港文匯報記者亦發現一個特別嘅地方，就係「民主黨」呢個名喺四頁嘅單張中只出現過一次，而且字體極細，除咗羅冠聰，單張仲引述咗港大政治與公共行政學系教授陳祖為、壹傳媒集團創辦人黎智英、立法會前議員區諾軒等幾位攬炒分子認為「民主派」議員應延任嘅言論。平時高調宣揚自己「政績」嘅鴿黨突然低調，唔知係咪知道自己冇乜支持者，所以騎劫吓其他陣營嘅民意呢?

網民又點睇呢個「講者無心，聽者有意」嘅情況呢?「antiwahkee」就建議：「為左(咗)一個垃圾會議席，民主黨真係可以極度無恥，羅冠聰求其up(噏)句唔關事都放得，咁不如放哂(晒)所有古人入去話支持你好唔好?」

工黨玩嘢搵司徒華「報夢」

工黨鄭司律就話收到民主黨已故黨鞭司徒華「報夢」：「 阿廷和阿聰份屬同僚，尚且可以接駁言論;司律和華叔(司徒華)本出一系(愛國民主，年年入維園)，為何不能隔世感通?感謝華叔支持全體『民主派』十月一日杯葛『臨立會』。」「Aki La」就好奇：「點解又唔見民主黨印製數十萬份入屋單張去宣傳『初選』既(嘅)呢?」

不過，一隻手掌係拍唔響嘅，「Kelvin Sin」就反問「抗爭派」：「公道講，張單張有冇扭曲聰講嘅嘢先?」「Chan Ching Wa Jonathan」亦話：「羅冠聰的一番言論雖非『直接』支持主流(留)派，但佢『進入與否，都不會引來國際反彈』呢句，老老竇竇係essentially negate(原質上否定)咗其中一個不接受中共『非法』安排『續任』嘅理據。」

「Fish Yu」都話：「自己小心啲就唔會被(畀)位人入啦，咪又係自己捉蟲!」

被袁弓夷暗指係鬼 三白眼賣慘扮可憐

千錯萬錯都係「同路人」錯，呢個就係民主黨林卓廷(三白眼)嘅邏輯。事緣佢近日數次喺網台同「抗爭派」中人辯論傳統「飯民」議員應否延任立法會，結果被攬炒派KOL袁弓夷拍片批評，話三白眼喺辯論時扮晒客氣，實質製造分化，故「同路人」應小心提防。三白眼隨即拍片回敬對方，聲稱自己一直對「同路人」十分客氣，又話自己一隻腳已踏入監倉，堅持留守議會係有不可推卸嘅責任，希望對方勿再誤解，要識槍口對外喎。

袁批林分化「同路人」有「重任」

正喺美國游說華府支持香港「抗爭者」嘅袁弓夷，近日就拍片批評三白眼最鍾意玩「語言偽術」，經常扮晒客氣咁分化「同路人」，又叫大家唔好睇小三白眼，因佢將來會有「重任」。袁弓夷又批評，接受延任嘅「民主派」都係自私賣港，「同路人」必須注意。

屢被狙擊嘅三白眼一改以往強硬嘅作風，首先聲稱自己十分尊敬袁弓夷呢位前輩，又扮晒可憐咁話自己日前已因去年「7.21」元朗站事件被控暴動罪，亦隨時被律政司加控其他罪行，所以自己將來只有「重刑」而冇「重任」，呢件事亦反映??家做議員嘅代價好高，希望袁弓夷唔好用詞太過、誤解佢哋喎。

網民「HK Freebird」就話：「袁爸爸(袁弓夷)講得你啱㗎，代市民發聲應該要求重啟選舉，還市民選舉權，唔係剩係掛住入立法局(會)。」「周志強」就替三白眼護航：「叫呢位袁先生返嚟香港做鬥爭，喺美國佢就講得口響啊，帶佢返嚟香港睇吓點樣。」「Choileung Philip」就反問：「佢意思係叫你在監房做重任，唔明嗎?」

改民調門檻又賴鍾庭耀

三白眼除咗識扮可憐托高自己，亦識將對自己不利嘅聲音賴落「同路人」身上，好似民主黨日前將決定佢哋去留嘅民調門檻，由「民主派」支持者嘅三分之二改為參與民調議員支持者嘅一半，結果被「黃絲」批評戀棧權位，淨係識搞個有利自己嘅民調。三白眼其後就話，佢曾兩度建議將調查對象改返做整體「民主派」支持者，只係被受託民調機構嘅代表鍾庭耀拒絕，完全唔關佢事㗎。

三白眼亦善於踩「同路人」嚟塑造自己清高嘅形象，事關佢日前同傳媒茶敘期間，大講佢曾去信主張離開議會嘅「議會陣線」朱凱廸，邀請對方就去留一事進行二人對談，只係對方冇回應。佢仲話民調門檻下調其實係佢嘅建議，因為原本三分之二嘅門檻太高，降到一半先令佢哋有機會離開喎。

「Hidi Or」就火滾：「馬後炮，公布嗰日唔見你出嚟講?諗住攞光環?降到一半唔係令你哋有機會走，而係方便你哋做數話有啱啱好過半市民支持你哋留低啫!」「區展鵬」就話：「鵪鶉黨你自己接受招安就唔好拉人落水!」「Simon Lau」就批評：「平時就『手足』，一講到要放棄議席人工，你就係鬼。」 

許智峯話留低好處多 竟係議員身份利眾籌

攬炒派最叻做乜?咪係做騷囉。不過咁，佢哋通常呢頭大仁大義，轉個頭就見利忘義。呢排民主黨等傳統「飯民」因為唔想杯葛立法會延任而俾「議會陣線」朱凱廸同「抗爭派」不停狙擊，鬧佢哋違背攬炒派支持者意願。民主黨許智峯前日就特登上網台節目解畫，話「留嘅好處係多啲」，仲將節目片段放上自己facebook。大家仲以為佢有咩高見，點知居然話冇咗議席就可能會影響眾籌喎。難怪有聽得明嘅網民鬧佢：「毫無黨格、遵(尊)嚴和原則，共產黨都睇唔起你哋啦!」

有時扮嘢真係好難扮一世。許智峯前日喺網台話：「我係好大力主張應該要留(任)......覺得應該『總辭』嗰班......有啲情緒主導得太多......要冷靜坐低諗多諗，留嘅好處係多啲。」佢一開聲就鬧班支持者情緒化，要冷靜聽佢講留低好處多喎。點知佢轉頭就鬼拍後尾枕話：「在做眾籌嘅時候，若我唔係一個議員，大家喺議會入面見到我嗰個形態，我所做嘅嘢，有冇民眾信任去一齊捐錢去做呢?」原來議席嘅作用居然係眾籌攞嚟嘅，認真厚顏。

唔少「手足」都覺得許智峯言論漏洞百出，淨係識以偏概全。「Hea Man」話：「 人地(哋)嘅理據你聽唔到，定當聽唔到呀?自己嘅意見就啱曬(晒)呀?人地(哋)就錯曬(晒)呀?」「KW Red Red」都話：「如果留任有用既(嘅)，過去一年仲使乜出黎(嚟)抗爭?點解年青(輕)人仲要出黎(嚟)『擋子彈』?」「Po Po Cheung」就話：「請民主派(傳統攬炒派)總辭，唔好扮聽唔到。」

有「黃絲」就直情覺得係見利忘義。「Jackie Mak」話：「 返『臨立會』出糧啦!出賣年青(輕)人，出賣香港人。」「Law SF」就話：「香港末日，泛民『投共』，所有試圖同你講體制內『抗爭』有用o既(嘅)都係廢話e.g.(例如)法律X同D(啲)督(篤)眼督(篤)鼻政棍。」

網民：窮得只剩下議席

亦有同路人話已對民主黨失去晒信心。「Psc Ch」話：「你地(哋)咁緊張議會，只不過係因為你地(哋)窮得只剩下議席，無左(咗)就一無所有，成日見你地(哋)啲唔同post(帖)重覆(複)同一堆軟弱無力嘅論點，我就嚟想unfollow(取消關注)你地(哋)啦。」