新歌MV挑戰落水戲唔識浮 蘇詠淳感緊張

香港文匯報訊（記者 余雁）繼童話故事第一章《踏空氣的人》後，蘇詠淳（Vincy）帶來第二章《沉進海的星》。新歌延續由Vincy親自創作的模式，今次與Ivy Hung共同作曲，並邀得周耀輝填詞，編曲由蘇道哲及Brian Yip負責，蘇道哲同時擔任監製。歌曲以「在大海裏尋找星星」的傳說為藍本，Vincy希望藉此提醒每一位樂迷：「每一個人都係一粒星星。」

談到歌曲想傳達的訊息，Vincy認為人往往忙於向外追尋，卻忘了回望內心：「好多時，我哋都會喺呢個世界周圍搵啲唔屬於自己嘅東西，好似搵星星一樣，但一直向外搵，就會唔記得望返自己嘅內心。」她相信每個人內在都有閃耀的部分，希望藉這首歌提醒大家把目光收回自身：「好希望透過呢一首歌同大家講，我哋每一個人都係一粒星星，只係可能你自己未發現。」至於如何發光，Vincy認為沒有標準答案，更建議樂迷不妨一邊聽歌一邊望海：「發光可以有好多種方式，因為每個人發光嘅模樣都唔同。希望大家聽呢首歌嘅時候，都可以想像自己用最喜歡嘅樣子發光。」

Vincy透露，最初只向周耀輝老師簡單說了故事設定：一個在海裡找不到星星而自我質疑的女孩，直到故事最後才發現自己可以變成一粒星星。收到歌詞後，Vincy 坦言「睇到起雞皮」，她特別喜歡其中一句「要光會有光有光 原來是我」：「我覺得『要光』係一個願望，『會有光』係發現嘅過程，『有光』就係發現咗，短短一句包含咗自我探索嘅過程。」她更大讚：「成份詞寫得好浪漫，同時昇華咗我對呢首歌嘅想像。」

MV方面同樣緊扣童話設定，上一章《踏空氣的人》，Vincy吊威吔飛上天空，飾演擁有踏空氣能力的女子；今次則由天空轉到大海，化身一個在海中尋找星星的女孩，為了成為特別的人而努力造船出海尋星。Vincy 表示角色與每個人的處境相似：「每個人都有想搵嘅嘢、想去嘅地方，但好多時搵極都搵唔到，望出去就係一片大海，唔知可以去邊。所以我呢個角色就係嘗試出海，去搵理想中嘅自己。」場景由天空轉到大海，拍攝難度亦隨之升級。不熟水性的Vincy今次要親身落水，她笑言：「我係一個唔太識游水嘅人，淨係可以向前游，但我唔識浮，所以有少少緊張。」