（有片）葵廣爆紅燒賣$10/6粒！憑什麼1小時狂賣千粒？慳妹帶你排隊試真啲

小小一粒燒賣究竟有幾大魔力？近期，葵涌廣場一間燒賣店掀起全港風暴，店家不單是每日人手新鮮現整，價錢仲超平，$10就有6粒，為食慳妹當然唔可以錯過啦，坐1個鐘車都要去試！遠道而來當然順便食埋區內另一燒賣名店「強記小食」，食到飽悠悠閒行去葵涌公園，打卡超靚的海景鞦韆和高速滑梯，真係不枉此行！ 文、圖：黃新雅

葵廣爆紅店手工燒賣好味抵食

這間店位於葵涌廣場地下，暫時都無店名，不過就在扶手電梯旁邊，好容易就可以搵到。慳妹到時大約是中午12點，上一波已經賣完，後廚正在快手包燒賣，要食的話就需要等到1點。老闆人都幾好，見到慳妹傻傻企住等，仲送兩粒燒賣畀我試食。等待期間，不知不覺間店門口打蛇餅，回頭一看，竟然已經有五十幾人在後面排隊，不過旁邊隨時有保安員維持秩序，雖然人多但一點都不亂。

店內的燒賣一共5大個口味，分別係墨汁魚肉、粟米魚肉、原味魚肉、蟹籽魚肉以及芫荽魚肉，價錢通通都係$10/6粒，仲有手打牛肉球（$10/4粒）、潮州粉果（$5/1個）以及白米腸粉（$10/4條）。除了燒賣之外，潮州粉果都好受歡迎，不少街坊遠道而來就為這一啖。不過老闆解釋，「自家的潮州粉果都係大師傅現場即製，今日大師傅放假，聽日都未必會有，只能請街坊們下次再試。」

排足1個鐘，終於買到啦！慳妹要了墨汁、芫荽、蟹籽三個口味各兩個，粟米及原味就係無貨。老闆用小碗裝住，淋上靈魂的豉油，都幾方便貼心。到手第一感覺就係皮薄，晶瑩剔透，裏面的餡料一眼就見到，仲要係爆餡，滿滿都係魚肉。不過呢，因為係人手包製，更因為不想讓街坊們等太久，造型方面就有些不修邊幅了，但也不影響口感，照樣好食。

外皮軟糯煙韌，內餡食得出魚味，彈牙爽口，每一種味道都有少少分別，蟹籽款鮮味更重，脆卜卜咁，口感比較豐富；芫荽款多添一陣香味，墨汁味就更彈牙爽口啲，外觀黑漆漆，咬開可見魚肉紋理。一定要點上店內特製的豉油，鹹度剛剛好，鮮味好濃郁，10元6粒性價比都幾高。慳妹目測現場排隊人數，估計一個鐘賣千粒燒賣都有可能！

位於葵芳站A出口的「強記小食」燒賣都出名，既然來了不妨一次試過啦！店內的魚蓉燒賣係$8/5粒，仲係大大粒，都算抵食。老闆會幫忙浸過一次豉油，仲有甜醬和辣油可以任加，不過只買燒賣係無小碗的，大家食的時候要小心被豉油淋到。

海景鞦韆 免費「纜車」睇靚景

食燒賣都食到飽，慳妹周圍行下散步消消化，葵涌公園就係一個不錯的選擇。公園有三組可以望住海景的鞦韆椅，飯後來坐下都幾愜意。上層是觀景台，景色好開揚，是捕捉夕陽的好去處。

這裏仲有一條瀡滑梯，據說是高速滑梯，童心爆發的慳妹也來試試。不過有點尷尬的是，穿着的牛仔褲似乎阻力太大，仲未滑出50厘米就卡住，只能手腳並用加速，試多一次結果都係一樣，建議大家可以穿柔軟一點的褲子再來玩。

公園內仲有一部斜道升降機，慳妹係第一次坐，感覺比普通的升降機要慢，對住海的一面有一整塊大玻璃可以望下風景，可以算作一次免費的短途「纜車」體驗。