阿Sa談債仔張致恆「火都嚟」 直言朋友幫到盡 最終要靠自己努力

蔡卓妍（阿Sa）昨出席活動講起債仔張致恆「火都嚟」，對於有地產經紀網上公開其疑似新住址，阿Sa否認在該處居住，又安撫「涉事」租客，希望他們盡快平伏心情；林峯自認有潛質做「特型演員」，羨慕阿Sa食極唔肥，但擔心她胃酸過多。

●香港文匯報記者 梁靜儀

阿Sa與林峯昨日以冬裝出席時裝品牌新店開幕活動，二人熱得不停抹汗，同場還有憑劇集《築夢莊園之喜馬拉雅》而爆紅的泰國女星Kimberley Anne Woltemas。

否認懷孕及搬東半山豪宅

近日完成賀歲片拍攝的阿Sa，昨日出席活動時，被問到疑有地產代理在網上大爆她與老公林俊賢（Elvis）搬入東半山一個相連戶，對此阿Sa連聲否認在上址居住，問到有冇唔開心？她就說：「咁麻煩嘅，平時去睇樓，經紀都會咁樣講，但講還講，唔係擺上網，擺上網就搞笑囉，（冇道德？）唔係咁好囉。」問到愛巢疑似曝光，會否因此搬屋？阿Sa就笑說：「我都唔係住嗰度，疑似啫，其實我嗰度啲保安好嚴密，我屋企內外都裝好多cam，因為近山邊，有風吹草動應該即刻去咗警署，所以我唔特別驚。（你指新居保安嚴密？）總之我𠵱家屋企，唔好理新定舊。」她又稱：「我個經紀用咗好多年，我非常信任，而經紀同經紀之間知道消息唔難，私底下講我接受到，但擺上網就係衰，呢個唔得囉。」問到她唔開心的程度有幾多？阿Sa以第三者角度戥當事人感到慘：「嗰個人就慘啦，畀人公開晒個地址，（畀人公開地址嗰個人個老公慘唔慘？）希望涉事嘅人可以平復心情啦，唔會受太大影響啦。」

Twins將於11月舉行一連五場《Prudential Presents Twins Side by Side Concert》Sidetrack演唱會，阿Sa形容日前睇到Rundown，可以用無懈可擊來形容，可以做三日，現時仍在修改中。她強調今次是Sidetrack演唱會，免得大家入場以為她們會唱經典金曲，結果一首都冇唱。問到會否打側手翻？阿Sa說：「𠵱家研究緊可能會有少少動作，但側手翻就唔會，可能會跳啲舞，今次想同歌迷多啲互動，開心啲。」早前盛傳懷孕的阿Sa，出席活動時不時用手掩肚，又穿平底鞋，不過她就堅決否認懷孕。

談到她的舊同事張致恆（Steven）在訪問中透露阿Sa是債主之一，問到她是否大債主？阿Sa嘆了一口氣才說：「大家都好久冇見，（冇諗過收返？）每一次有朋友需要幫忙，其實我根本都冇諗過會唔會收得返，完全冇諗呢啲，收得返咪ok啦，就算冇我都唔會話要點樣嘅，只不過咁樣真係唔係辦法，我指最近身邊有朋友仲有幫手，人哋唔係欠咗你，你真係要努力啲囉。」問到仍有幫手的朋友是否指關智斌？Sa就不欲多提。問到她是否拒絕再幫手？她坦言：「我有啲朋友要養妻活兒，打緊三份工，如果都仲有困難，我再幫手都無所謂，唔想再講，一講起火都嚟。」

林峯羨慕拍檔食極唔肥

同場的林峯穿上大褸，被現場粉絲大讚靚仔。林峯透露完成與阿Sa合作的賀歲片後，本月18號將飛往泰國拍新戲。早前泰國持續暴雨引發多區嚴重水浸，林峯表示都有留意，但還未確定拍攝地點。問到太太張馨月會否同行？他指11月女兒學校有幾日假期，但要視乎電影拍攝進度再決定，如果拍攝進度緊密，未必有時間照顧妻女。

提到太太之前生日po性感相，獲網民大讚索爆，他笑指：「太太食極不肥好乞人憎，阿Sa都係。我有問過佢有冇check過個胃，會否胃酸過多。」他指太太宵夜食炸雞髀和炒麵，熱量驚人，如果跟太太的食量，一定變「特型演員」。

另外，林峯將於12月舉行《GO WITH THE FLOW》巡迴演唱會廣州站，並會請來鍾嘉欣任嘉賓，林峯笑言自己也是最後一個知道，不知道公司的安排。至於老闆古天樂也是表演嘉賓，林峯笑說：「打鐵趁熱，我絕對相信佢係鍾意舞台，睇吓佢幾自由奔放。」