邱士縉為角色練習咬字趁轉機位補眠 朱鑑然對劇本嚴陣以待

香港文匯報訊（記者 子棠）MIRROR成員邱士縉（Stanley）、陳子豐、朱鑑然在正在播放的電視劇《COURT!》中，分別飾演不同的律政人員，並以各自擁有的身份分享對故事的看法。

劇中飾演法官的Stanley表示：「角色人物對真相係非常之追求，好正義，仲好執着要搵到事實嘅真相，認為法庭呢個地方就係可以還原返事情嘅經過，畀受害人或被告一個清白。不過看畢劇本後，就覺得法庭其實唔係一個追求真相嘅地方，只係一個盡量用持平嘅司法方式去維持返呢個社會嘅秩序，我都好Appreciate呢個世界如果有多啲呢種類型嘅法官嘅話，可能成件事會再完整啲。」為了演好角色，Stanley下了不少苦工，「因為角色係一個法官，要比我平時講嘢更加字正腔圓，更加清晰，更加要冇懶音，呢方面我都有再練習多啲咬字再清晰啲。對白要好熟，都係好大嘅挑戰。」他自爆拍攝趣事指，因律師對話很長，轉機位需要時間，試過輪到拍他這位法官時，他卻正在「瞓覺」。

陳子豐飾演Stanley的上司及師兄，同樣是一名法官，「劇中講述我同Stanley一齊成長，但師父比較錫Stanley，令我有丁點兒妒忌。不過現實中，我期待同Stanley合作好耐，我哋曾經多年前合作過《大叔的愛》，但好少對手戲，雖然今次我戲份唔係好多，但主要嘅對手就係Stanley。有幾場戲嘅情緒都有啲起落，同佢之間都有啲緊張、衝突，呢幾日都好緊張，好似好熟悉Stanley呢個人，會擔心做出嚟舒唔舒服。到今日就覺得有火花，係幾好睇，希望大家鍾意。」由於沒有法庭戲，反而令陳子豐鬆一口氣及感慶幸，因法庭戲對白很長。

朱鑑然飾演精明能幹的年輕律師，頭腦轉數快，注重打扮，造型「身光頸靚」。拍攝煞科戲當天，他有感而發：「開心嘅時光過得特別快，我係盡咗力去準備呢個角色。我台詞嘅功力或表達一向係比較差，對劇本係真係嚴陣以待，我覺得呢個係上天畀我好大嘅一個挑戰，亦令我好雀躍，好愛呢個挑戰。」他大讚劇本的台詞、順暢及精準度令他讀一次已經清楚記得，還了解所有角色的功能和關係，非常厲害。