陳曉華爆曾被行內人當面奚落演技

香港文匯報訊（記者 阿祖）陳煒與陳曉華早前為葉念琛主持的節目《越問越雙琛》擔任嘉賓，主題直搗演員核心問題——「入戲太深，會否很容易不能自拔？」

陳曉華說：「入戲就好似拍拖，初時唔識愛、後來愛得太深、最後要學識唔好太投入。」她坦言自己第一部劇《迷網》時，連錄影廠的太陽是燈光都不知道，凌晨三點問對手楊明「點解太陽仲未落山」，完全處於迷惘狀態。直至拍攝葉念琛執導的《美麗戰場》，她才第一次真正感受到投入。「我唔覺得自己好投入，我只係覺得我明林小美（劇中角色）諗緊咩，我知道佢死嘅時候係咩感受。」陳曉華更自爆一段藏了很久的「陰影回憶」。她透露拍攝初期，曾有一位行內人當面冷冷拋下一句：「得啦！做嚟做去都係咁！」她形容當下腦袋一片空白，強忍淚水，最後躲進洗手間痛哭。她坦言至今仍記得那句說話，但已學識「聽唔到就算」，不再讓別人的批評動搖自己。

陳曉華透露拍《異空感應》後「出事」，整整一個月走不出角色，「因為嗰套戲我要做一個逃犯，要瞓坑渠、瞓好多垃圾嘅地方。到我拍完，好想去啲垃圾堆，當自己係垃圾。太光鮮亮麗，我唔習慣。」後來她自創一套「開門關門」方法，為每個角色在腦內建立一個獨立空間，煞科後鎖上門：「陳曉華都攞得起、放得低，冇角色係攞得起放唔低嘅。」

陳煒拍患癌角色陷抑鬱狀態

陳煒憶述拍攝《美麗傳說2》時，因角色患癌要與所有愛她的人道別，整個人陷入低潮。「我嗰段時間好入戲，基本上除咗開工之外，我將自己收埋喺酒店房，唔想出嚟。」她形容當時完全不修邊幅，只去便利店買乾糧、杯麵，瘋狂將垃圾食物塞入口。「個狀態係好唔開心，好似抑鬱症咁。」她坦言角色人生太悲慘，煞科後仍維持這種狀態，直至下一套戲開拍才逐漸走出來。

陳煒在《正義女神》中飾演資深大律師，她認為對她最震撼的一幕是其兒子在犯人欄被押走時，不斷呼喊「媽媽你幫我」，「劇本寫我前面唔可以喊，我一路忍。直至到佢一路被人拉入去，叫『媽媽你幫我、點解你會咁樣、你快啲反抗』嗰一刻我情緒崩潰，但都要頂住。」她表示，停機之後，她終於忍不住哭出來，「我喊出嚟，全世界都望住我，然後我行去犯人欄個仔嗰邊。」