獲譚耀文讚落淚超精準 阿佘授「劇本背默大法」

香港文匯報訊（記者 梁靜儀）區永權主持的《一周星星》邀請佘詩曼（阿佘）及譚耀文（阿譚）擔任嘉賓，向來快人快語的阿佘，先後回應了「高超落淚技巧」「立定遺囑」「7日時間背100頁對白」及「食極唔肥」等多個傳聞及熱話。

談到喊功，阿譚大讚阿佘落淚Timing超精準：「佢真係可以去到邊一秒要喊，就撳掣可以喊㗎喇。」區永權聞言即打蛇隨棍上追問，指曾有《宮心計》幕後指出，阿佘對劇本時不但主動問工作人員「邊一句要喊」，更會問埋「要左眼還是右眼（落淚）」。阿佘坦言由於監製要求高壓力爆煲，故拍畢後依然因壓力關係失眠長達半年，後求診中醫的答案是「好似跑車開咗turbo唔識停」。

至於被閨蜜文頌嫻「指控」為何食極都能擁有「千年佘腰」，阿佘忍不住開心謂：「我真係食極都唔肥，同埋我一定要食消夜。如果我唔食消夜就瞓覺多兩三日，我係會瘦㗎。」阿譚又忍不住：「可唔可以借啲DNA嚟驗吓？」阿佘親揭之所以擁有這樣的體質，全因一次極致的拍劇經歷……

阿佘又開心Share「超認真劇本背默大法」：「我坐車係唔講嘢㗎，咁我前面有一疊通告單，我就會反轉佢嚟，反覆書寫對白，反覆五六次就能記牢喇。」

另製作組還找到了阿譚當日參加《新秀》時，所表演的超精彩後空翻，以及阿佘當年拍攝《無名天使3D》時的超高難度飛天遁地動作場面。