新歌靈感延伸辦繪畫比賽 羅啟豪任評審讚有意義

香港文匯報訊（記者 子棠）以羅啟豪（Ramon）新歌《月球上的藍玫瑰》為靈感延伸，歌迷會「豪吧」舉辦繪畫比賽，吸引了來自不同地區的人參加，由Ramon親自負責評審，得獎及精選畫作從昨日開始到5月4日，在深水埗一間社企食肆展出。為配合畫展，雙方團隊合作研發相關的限定餐單，讓大家可以一邊欣賞作品，一邊慢慢感受味覺與畫作之間的連結。

在《月球上的藍玫瑰·盛放》畫展揭幕日，Ramon將證書與獎品逐一頒發給繪畫比賽的優勝者，歷屆《中年好聲音》好友黃博、顏志恒、丁文俊、梁浩賢、曹越、林彥言、李泇霖等到場見證。對於今次繪畫比賽反應熱烈，Ramon由衷表示：「每一幅畫都令我相當感動，估唔到大家可以用唔同嘅角度去睇呢首歌，有啲作品甚至令到我眼濕濕，今次參與評審同有份構思成個畫展，我覺得好榮幸同好有意義！」提到食肆聘請自閉症青年以及為他們提供培訓實習，創造就業機會，湊巧Ramon選出的傳統繪畫組冠軍得主，正是一名育有自閉症孩子的媽媽，Ramon解釋：「呢個真係巧合，我嘅評選準則唔單止係要靚，仲要睇幅畫嘅意念同心思。呢幅冠軍作品正正係寄託咗呢位媽媽嘅心意，期望佢嘅孩子同普通細路仔擁有一樣嘅心智，就好似『月球上的藍玫瑰』，係罕有嘅，即使人生唔容易，父母依然會以不平凡嘅愛去守護！」

生日破戒 腹肌仍需努力

Ramon正全力為6月6日與譚輝智合作的《雙聲演唱會》備戰，日前生日的他在慶祝之餘仍不忘操肌。Ramon笑言：「生日嗰日我去咗做gym，夜晚就同屋企人食飯，由於呢排要忍口，我一早叫咗屋企人唔好買蛋糕，點知顏志恒、魏嘉信同佢哋嘅太太，四個人幫我炮製驚喜，夾份送咗個生日蛋糕畀我！第二晚約咗同屆『中一生』食飯，佢哋又預備咗蛋糕，加埋同『豪殼』聚會，再嚟多個蛋糕，我點都要破戒，唯有再努力啲keep fit至得！」目前Ramon的雙臂已漸趨結實，惟腹肌仍需努力，他稱以跟肚腩劃清界線為目標，生日願望是人人身體健康，初踏紅館演出成功！