【星光背後】衛詩雅擅長挖掘角色亮點 謝君豪接戲不標籤正反派

「樂於挑戰、拓展戲路」是每位演員的共同心聲。有演員渴望挑戰極端角色如殺手或反派，因為能展現更多層次；有人希望重演舊角色，以人生經驗帶來新演繹。活躍演藝圈三十多年的影帝謝君豪就以自身經驗指出，人性同時存在光明與陰暗面，從正派角色中也可發掘弱點和陰暗面，從反派中也可嘗試尋找角色善良之處，演起來都更立體，揭示演戲是一場自我探索與挑戰的旅程。

文：娛樂組

衛詩雅去年憑電影《破·地獄》榮升金像影后，今年她憑《再見UFO》再獲提名金像獎最佳女配角，演技備受肯定，問她還有什麼角色想演？衛詩雅說：「我最想演嘅反而係演返一啲以前演過嘅角色。比如我10年前演、8年前演嘅，當時一定冇𠵱家嘅經歷，所以再演嘅話會用咩方法去處理呢個角色呢？咁自己對呢個角色一定有唔同睇法，亦都有機會有所進步，所以會想有一模一樣嘅戲畀我拍多一次，或者演一啲電影嘅續集。」

衛詩雅表示每一個角色都會想再演多一次，更提到希望拍到《不日成婚3》，因為跟其他演員都一起成長了，都是回憶滿滿。而過去衛詩雅都給人乖乖女的感覺，所演的角色也多數屬正派，問她會否想演奸角？她沒考慮便搶答：「好想！超想演反派！應該咁講，我每次睇劇本都會搵到當中嘅有趣點，所以每個角色自己都會想演，有時明明自己做A嘅角色，都會覺得B嘅角色都好好，想去演埋一份，我就係咁奇怪！」

至於過去的經典電影中，又有哪個角色吸引她想去演？衛詩雅即說：「我會想起《甜蜜蜜》張曼玉所演嘅角色，如果有人翻拍，我真係好想有機會參與，我睇《甜蜜蜜》嘅時候仲係小朋友，都未知咩叫愛情，但係睇嘅時候就覺得好甜，到大個再睇又會有唔同想法，亦都會諗自己演唔演到呢一個感覺出嚟呢！」

影帝謝君豪的舞台劇及電影演出經驗豐富，在《南海十三郎》與《我和春天有個約會》中，他所演的南海十三郎和話劇團演員Danny給觀眾留下了深刻印象。現在謝君豪會怎樣選擇角色出演呢？謝君豪表示選什麼角色也不緊要，首先不要標籤角色是正派還是反派，因為人性會有他的正面，亦會有他脆弱時的弱點和陰暗面，他說：「在某個情況，表面上某個人好正義，但有時候佢都會變為一個小人，比如我通常去演一個好正直嘅人，咁就喺佢正直之中搵佢嘅一個弱點、脆弱嘅一面，演出起嚟就會立體一啲；又比如我要做一個壞人，我會去搵一搵佢有冇一啲善良嘅地方，或者一啲有人性嘅地方，咁都可以容易演得立體一啲。」

謝君豪表示當年「仙姐」白雪仙曾講過一番說話，令他一生受用：「仙姐講過『文戲要武做，即武打咁做，文戲咪好爽朗囉，咁武戲又要點呢？要文做，打得嚟就細膩、有戲而唔係齋打』，呢番說話令到我好有啟發，就等於我演一個普通好人角色，睇吓佢有咩弱點，所以其實演好人或者壞人都冇所謂，最緊要個角色自己有冇感覺先？如果我唔動心，觀眾都唔會動心！」他演過不同類型，包括忠奸喜悲角色，哪個角色又是他最喜歡的？謝君豪笑說：「好多，個個都鍾意，因為都花咗好多時間、好多工夫沉落去，每一個角色都有自己少少嘅影子在內，可以透過角色將不同嘅自己去發揮出嚟，會發覺『咦！原來我係咁嘅』，有時我自己都唔知，令到自己再認識自己多一啲，因為做戲都係認識自己嘅一個過程！」