一度質疑簽約TVB抉擇 JW轉做獨立歌手自資出歌

香港文匯報訊（記者 子棠）王灝兒（JW）近日到電台宣傳她轉做獨立歌手後的首支派台歌《你離開之後》，表示馬年會全力瞓身回歸樂壇，將自資製作多首派台歌。

JW回憶從當初加入由黎明主理的A Music，入行15年期間5年一變，前後經歷過3間公司，她承認自己在每間公司的事業也是經歷先起後跌的命運，曾感不開心，但回望又覺得是好事，「要經歷一下，明白到喺谷底嘅時候點搵方法上返去係好難，但問題唔只得我一個遇到，我嘅決定就係要轉一轉。」重提2021年為拍劇簽約TVB，但在2023年拍完《痞子無間道》後，已兩年多沒有劇拍兼未再出派台歌，令她一度懷疑自己，「我算好彩，想演戲又真係試到，仲要拍古裝《痞子殿下》，亦學識自己照顧自己，捱足52個鐘無覺瞓，唔同以前做歌手成大班人照顧你。而《痞子》後就無戲拍，對音樂點都有一定影響，都會有唔開心，覺得自己係唔係做咗一個唔啱嘅decision（決定）。但我都試過要試嘅嘢，就覺得係時候要返去唱歌。」

感情方面，回復單身的她表示有追求者出現，但從前很坦白會大方談及戀情的她，經歷被標籤「釣金龜」及遭受眾多網上欺凌後，她決定不再坦蕩蕩，「係好多Haters，誇張到好似我傷咗佢嘅心，佢哋根本乜嘢都唔知，亦唔知我經歷咗啲乜，網上嘅人就鍾意睇人死，做娛樂圈嘅女仔係好慘。」JW最抗拒是外間誤解她一拍拖就不用工作，她強調從中學參加歌唱比賽後，一直都是只靠自己工作賺錢，包括買樓、買車，連做音樂都是自己出錢。「我發覺越解釋，啲人就越話你掩飾，唯有做好自己，用努力證明畀人睇，總之我𠵱家好開心，身邊嘅人都好愛惜我同支持我。經歷咁多同遇到唔同人之後，我嘅Mr. Right係要同我理念相近，會一齊勤力同進步嘅人，我唔啱做少奶，我要不停工作。」