《夜王》「葵芳」爆紅 蔡蕙琪自由身積極接工作

香港文匯報訊（記者 余雁）電影《夜王》氣勢如虹，港澳地區票房已衝破9千萬港元！而眾多角色之中，除了主角「歡哥」（黃子華 飾）和「V姐」（鄭秀文 飾）受歡迎外，還有一位獲封為《夜王》MVP演員的「葵芳」蔡蕙琪（Kay）亦非常突出，Kay近日受訪分享爆紅感受。

問到成為香港娛樂圈2026年第一個MVP，阿Kay就表示驚訝：「我只係想講新年快樂哈哈哈！新年好！我令到大家紅上加紅只係有咁樣嘅感覺真係學電影裏面話齋，一言難盡呀！其實可以話係我個人演藝生涯中嘅一個里程碑，事業上嚟講，以我今年嘅年紀，應該啱啱好係一個人嘅事業需要去起步嘅年齡，所以對我嚟講係一個好大嘅支持。」

對於導演曾經在訪問中坦言，她是在一堆被遺棄的履歷內掘出來，阿Kay亦知道這件事：「因為副導就話嗰堆人係『kam』嘅，咁導演一聽到『kam』呢個字，就雙眼發光！跟住佢睇到試鏡嘅片段就笑咗出嚟！而喺設計『葵芳』呢個角色嘅時候，就同劇組嘅人諗到用鄺美雲加林明禎合體嚟塑造，呢個係一個方法令自己喺試鏡時都享受嗰個過程，當自己做唔到嬌嗲可愛嘅時候，就用另一個方法去投入！搵一個面具戴上去，將佢慢慢發展成為一個角色，最後就成就咗『葵芳』喇！」

講到電影中一個爆笑場面，就是「葵芳」在出場前剃毛同時畫眉，阿Kay就笑言是爆肚：「其實呢個係現場度出嚟嘅！因為當時阿Fish（廖子妤）飾演嘅Mimi媽，其實係教緊我畫眉，同一時間，我就喺度剃緊毛，所以我一手攞住眉筆，一手攞住剃刀！跟住『阿卵』楊偉倫就問我想點啫！先至有呢句對白！」

說到將來的發展，阿Kay準備就緒，笑說：「嗱！我𠵱家係自由身嘅演員，我冇隸屬任何劇團及公司，十八區我都會去，唔只留喺葵芳。任何劇團、任何電影，有工作就搵我啦！唱歌就有啲抆水，音樂劇都可以考慮一下，哈哈哈！」