譚旻萱體驗米蘭時裝周 極速飲食令外國人詫異

香港文匯報訊（記者 阿祖）憑演出《夜王》人氣急升的女演員譚旻萱（Mandy）最近獲邀到米蘭出席時裝周。作為新生代藝人，Mandy有幸首次到當地欣賞多場2026秋冬季時裝騷，令她眼界大開。經過近一周的緊密行程， Mandy笑言相當充實，心情戰戰兢兢，同時也是一個非常好的體驗，她說：「米蘭真係一個充滿時尚感嘅城市，去到邊度每個人都會打扮得好靚，就連只是走在街道上嘅公公婆婆，都着得好時尚好靚，令我自己都覺得要分外注意打扮。就連我去到二手店shopping，店員都會畀滿滿嘅情緒價值，經常會讚你好靚，令到個人心情好好；而我都留意到當地對寵物非常友善，去到邊都可以攜帶寵物，就連車廂、高級餐廳都可以共融，我會覺得做寵物都好幸福！」

Mandy今次遠赴米蘭的高級餐廳，都不忘將「港式茶記飲食文化」帶到外國，她笑說：「有一日我哋訂咗間高級餐廳食飯，餐廳係望住好靚嘅大教堂，因為我哋工作關係時間好趕，我哋又想把握時間食完嘢出去影吓靚相，最後我哋只係用咗5分鐘時間就食晒枱上面嘅嘢，然後埋單，點知餐廳嘅店員好驚訝，好疑惑咁問我哋係咪真係食完，我哋都覺得好搞笑，呢個係香港人茶餐廳精神。」而在餐廳內，Mandy更有意外驚喜，遇上韓國女團aespa成員Karina，Mandy超級興奮說：「我哋喺餐廳遇到Karina，見到我嘅超級偶像，當時我托住手踭點咗個頭，反而好似嚇親佢，佢都即刻好害羞咁揮手點頭。」