賣比卡超都有基金？迷策略推首隻寶可夢藏卡基金 入場費無需「抽卡」咁搏

香港文匯報訊（記者 馬翠媚）適逢寶可夢誕生30周年，香港上市數字資產企業迷策略（2440）宣布，推出全球首隻寶可夢藏卡代幣化基金，專攻「梵高比卡超」PSA 10滿分卡牌，目標係掃走市面上約25%貨源。

現時藏卡市場炒風強勁，一張卡隨時貴過「成棟樓」。事源今年2月，一張「比卡超插畫家」PSA 10評級藏卡，拍賣價衝上1.28億元，打破運動卡紀錄！整個收藏品市場預計2031年殺到6,280億美元，淨係收藏卡呢瓣，由2025年147億美元彈到2034年374.2億美元。寶可夢卡牌過去20年仲要累升逾30倍，跑贏唔少傳統資產。

基金主打的「梵高比卡超卡牌」，係寶可夢同荷蘭梵高博物館crossover傑作，將《戴灰色毛氈帽的自畫像》變成比卡超，全球得4.7萬張PSA 10滿分版，市值估計逾9,400萬美元。自2023年底推出以嚟，呢張卡二手價已經升咗超過4倍，仲要係「有升冇跌」嗰隻。

以前班大戶想玩藏卡，最大煩惱係三樣嘢：假貨、保管、同埋買唔到貨。迷策略今次就同持牌平台EVIDENT合作，將基金權益代幣化，實體卡就擺喺博物館級保管庫，恒溫保安24小監控，仲要每半年由德勤等四大會計師樓做儲備證明審計，實行做到「滴水不漏」。

迷策略行政總裁陳展程表示，計劃透過嚴謹機構級金融規範，讓專業投資者無需承擔實物所有權負擔即可參與文化資產市場。EVIDENT創始人Florian M. Spiegl指,收藏品是另類資產中最具潛力市場之一，平台按最高監管標準將資產結構化，為專業投資者提供可信賴的市場基礎設施。

基金由迷策略全資子公司擔任普通合夥人，公司同時作為有限合夥人進行策略性投資。

不過亦有專家提醒，收藏卡市場價格波動極大，受潮流及市場情緒影響，歷史升幅不保證未來回報。二手市場流通性較低，或需折讓出售。同時，基金僅限專業投資者，未必適合所有人。