為囡囡取名「愛嘉」 方力申疑想追多個

香港文匯報訊（記者 梁靜儀）新手爸爸方力申（小方），自去年愛女Isla出世後，經常在社交平台分享女兒的成長點滴，不經不覺女兒已3個多月大，今日（26日）他又分享與女兒的合照，並發長文分享為人夫兼人父的感受。

小方以一場遊戲形容人生：「如果人生係一場遊戲，單身嗰陣我覺得自己都幾好，工作穩定，有過啲成績，自己同父母都健健康康，呢個遊戲玩得幾好。但結婚後，我發現呢個遊戲突然難咗好幾級。愛情唔係淨係得個講字，真係要行動，仲要一齊維繫感情，結婚後更要用行動去實踐一生一世嘅承諾。」小方又指女兒出生後，完全體會到「養兒一百歲長憂九十九」這句說法，各種計劃、擔心不斷湧現，他與太太一齊經歷，令他覺得未來這個旅程更加刺激，緊張得來又充滿期待。他說：「每個人都有唔同選擇去過人生，單身，就係將『自己』活出極致，結婚生小朋友，就係將『我』變成『我們』。」

小方更宣布女兒中文名叫「方愛嘉」，而背後原來甚有意思：「揀『愛』字係因為我屋企房間門口有兩幅書法分別係『愛』同『家』。對我嚟講，家庭係最重要，『愛家』係我生活嘅重心。而且『愛』嘅普通話發音又可以同Isla呼應。至於『嘉』字，係老友陳定幫師傅幫我哋改嘅，發音亦係同『家』字一樣。」

他指當日是先為女兒改英文名，然後再改中文名：「我哋嘅家庭Family，F代表Fong，A係Alex，M係Maple，I係Isla，L係未來嘅寶寶，Y係Yip，既然中英文意思都咁夾，所以就乾脆叫佢愛嘉啦。Isla 愛嘉，爸爸今日嘅願望就係希望妳能夠一生平安、健康、快樂！（其他就隨緣啦）。」小方似在暗示會為女兒添個弟妹。