澳門騷玩空中鋼管型爆 關智斌邀師妹VIVA鬥舞

香港文匯報訊（記者 子棠）關智斌（Kenny）日前於澳門舉行「The Endless Adventure Live in Macau」，除了大展身手玩Flying Pole（空中鋼管），還多次與歌迷真情對話，更宣布正式成立官方粉絲後援會；寵粉的Kenny更特別以去年在啟德演唱會安歌時未能送給粉絲的《眼紅館》作為開場曲。他說：「上次演唱會因時間關係唱唔到呢隻歌，令到我喺2025年留下咗遺憾，所以我覺得2026年第一時間一定要唱返《眼紅館》畀大家聽。」全場即時報以熱烈掌聲感謝Kenny這份新年禮物。

完成Flying Pole環節後，Kenny大談感受，「其實我每次練呢支Pole嘅時候，都幾孤獨，因為每次就算轉到暈或者升到好高、或者周身損晒，其實係冇人幫到你，冇人救到你，一定係要靠自己。」Kenny覺得Flying Pole很能表現那種無力感和失重的感覺。去年啟德騷因場地問題無法呈現，今次終可圓夢，他寄語：「無論世界幾黑暗，只要一抬頭始終會有一啲好微弱、好溫暖嘅光去守護住你哋。」

Kenny邀請了同門師妹女團VIVA擔任嘉賓，他說：「以前我哋細個，成日跟着啲師兄師姐去好多唔同嘅舞台做佢哋演唱會嘉賓，佢哋畀我呢個機會，我才有今日嘅舞台，所以我會將呢個機會承傳落去。因為喺排舞嘅時候我真係見到佢哋有好大嘅熱誠，好專業。」VIVA的Macy亦分享演出心情：「我頭先有一個高音位，個動作係要挨向Kenny嗰度，其實我係好驚走音，因為我心跳加速，驚控制唔到自己。」Ada即「投訴」綵排時Macy要求「挨多次」，搞笑稱自己冇機會同Kenny有任何身體接觸「好唔抵」。

安歌環節，Kenny驚喜現身觀眾席，歌迷即時瘋狂向他派發利是。之後再Encore唱《死性不改》時，Kenny發揮搞笑本色，稱新年應改叫《靚性不改》，大家今年繼續靚。